BIZMANDU
www.bizmandu.com

पहिलो हाफमा अघि रहेको नेपालमाथि जोर्डनको पुनरागमन: पेनाल्टी सुटआउटमा नेपालको हार

२०८० फागुन १८

पहिलो हाफमा अघि रहेको नेपालमाथि जोर्डनको पुनरागमन: पेनाल्टी सुटआउटमा नेपालको हार
पहिलो हाफमा अघि रहेको नेपालमाथि जोर्डनको पुनरागमन: पेनाल्टी सुटआउटमा नेपालको हार


काठमाडौं। नेपाली महिला फुटबल टोली वेस्ट एसियन फुटबल फेडेरेसन (वाफ) महिला च्याम्पियनसीपको फाइनलमा पराजित भएको छ।

Tata
GBIME
Nepal Life

साउदी अरबको प्रिन्स अब्दुल्ला अल फैसल स्टेडियममा सम्पन्न फाइनल खेलमा जोर्डनले नेपाललाई हराउँदै च्याम्पियन बनेको हो। निर्धारित समयको खेल २-२ गोलको बराबरीमा टुंगिएपछि खेल पेनाल्टी सुटआउटमा पुगेको थियो। जसमा नेपाल जोर्डनसँग ५-३ गोलअन्तरले पराजित हुँदै नेपालले उपविजेतामा चित्त बुझाएको हो। योसँगै नेपाल फरकफरक प्रतियोगितामा ११ औँ पटक फाइनल पुगेर उपाधिविहीन बनेको हो।

जोर्डनविरुद्ध गोल गरेपछि नेपाली खेलाडी। तस्बिर: वाफ

पहिलो हाफमा राम्रो पकड बनाएको नेपालले खेलमा अग्रता बनाएको थियो। २८ औँ मिनेटमा रेखा पौडेलको पासलाई सविता राना मगरले गोलको दिशा दिँदै नेपाललाई अग्रता दिलाएकी थिइन्।

पहिलो हाफमा एक गोलले पछि रहेको जोर्डनले दोस्रो हाफमा खेलमा फर्कियो। खेलको ७३ औँ मिनेटमा जोर्डनकी लाना फेरासले नेपालको अफसाइड ट्रापकाबीच गोल गरिन्। त्यस्तै ८९ औँ मिनेटमा तीन डिफेन्डरका बीच सारा अबु सबाले गोल थप्दै जोर्डनलाई अग्रता दिलाइन्।

नेपालले इन्ज्युरी समयमा खेलमा पुनरागमन गर्न सफल भयो। जोर्डनका खेलाडीले पेनाल्टी बक्सभित्र ह्याण्डबल गरेपछि पाएको पेनाल्टीको अवसरमा गीता रानाले गोल गर्दै खेल बराबरीमा ल्याइन्।

प्रतिस्पर्धामा नेपाल र जोर्डनका खेलाडी। तस्बिर: वाफ

पेनाल्टीमा नेपालकी गोलकिपर कप्तान एन्जिला तोम्बाफोले कुनै प्रहार रोक्न सकिनन्। यता नेपालका लागि अमृता जैसीको प्रहारलाई जोर्डनकी गोलकिपरले रोक्दा नेपालले उपविजेतामै चित्त बुझाउनु पर्‍यो।

खेलपछि नेपाली टोलीकी सदस्य दीपा शाहीले सावित्रा भण्डारी ‘मिस’ भएको बताइन्। प्रतियोगिताको सर्वाधिक गोलकर्ता भण्डारी सेमिफाइनल खेलेर क्लब ड्युटीका लागि फ्रान्स गएकी छिन्।