उभौली पर्वको उमंग : जगडोल वनमा साकेला नाच्दै रमाए किरात समुदाय (तस्विरहरु)

काठमाडौं । किरात राई समुदायले आज उभौली पर्व मनाउँदैछन्। भूमेस्थानमा पूजा आराधना गरि यो पर्व मनाइन्छ। बाली लगाउनुअघि गाउँ गाउँमा रहेका भूमेस्थानमा राम्रोसँग काम होस् भनी प्रकृतिको पूजा आराधना गरिने परम्परा रहेको हो।

गर्मी बढ्ने भएकाले यो समुदायका मानिस बेँसीबाट लेकतिर उँभो लाग्ने भएकाले पनि यसको नाम उभौली रहेको कथन छ। वैशाख शुक्ल पूर्णिमादेखि चराचुरुङ्गी लगायत जङ्गली जनावर पनि उँभो लाग्ने किराँत समुदायको विश्वास छ। नदीमा माछा पनि गर्मीबाट बच्न बेँसीको नदीबाट लेकतिर लाग्छन् भन्ने भनाई पनि छ।

उँभोको अर्थ खेती पाती राम्रो होस्, धेरै होस्, उन्नति होस् भन्ने भनाइ पनि रहेको छ। यस पर्वका अवसरमा चण्डी नाच समेत नाचिन्छ। यसैकारण वैशाख शुक्ल पूर्णिमाको दिनलाई चण्डी पूर्णिमा पनि भनिन्छ। किराँत समुदायका पनि विभिन्न सम्प्रदायका बीच साकेला नाच पनि नाचिन्छ।

आज राजधानीको गोकर्णेश्वर नगरपालिका-४ स्थित जगडोल सामुदायिक वनमा पनि किराँत समुदायका मानिस जम्मा भएर साकेला नाचेका छन्।