Bizmandu
www.bizmandu.com

विराटनगरमा अपाङ्गता भएकालाई स्वरोजगार बनाउने अभियान, कात्तिक १८ मा रोजगार मेला हुँदै

विराटनगरमा अपाङ्गता भएकालाई स्वरोजगार बनाउने अभियान, कात्तिक १८ मा रोजगार मेला हुँदै


विराटनगर। अपाङ्गता भएका व्यक्तिलाई रोजगार र स्वरोजगार बनाउने उद्देश्यले विराटनगरमा दुई दिने रोजगार मेलाको आयोजना गरिने भएको छ ।



नेपाल उद्योगवाणिज्य महासंघ प्रदेश १ सहित ४ संस्थाको संयुक्त आयोजनामा आगामी कात्तिक १८ र १९ गते अपाङ्गता भएका व्यक्तिहरूका लागि रोजगार मेला–२०२२ को आयोजना हुन लागेको हो ।

मेलाका अन्य आयोजकमा महासङका साथ द लेप्रोसी मिसन नेपाल, राष्ट्रिय अपाङ्ग महासंघ नेपाल र करुणा फाउन्डेसन छन्। 

मेलाको जानकारी दिन बिहीबार आयोजित पत्रकार सम्मेलनमा महासंघका प्रदेश १ का उपाध्यक्ष राजेन्द्र राउतले महासंघ प्रदेश १ ले यसअघि अन्य संस्थासितको सहकार्य र समन्वयमा अपाङ्गता भएका ७५ जनालाई रोजगारी दिइसकेको जानकारी दिए। उपाध्यक्ष राउतले महासंघ प्रदेश १ कै कार्यक्रमअन्तर्गत यसअघि अपाङ्गता भएका १२५ जना स्वरोजगार भइसकेको बताए। 

उनले मेलामा रोजगारदाताको बढीभन्दा बढी सहभागिता गराउन प्रयास र संयोजन भइरहेको स्पष्ट पारे । यसका लागि १ सय रोजगारदातासित परामर्श भइसकेको छ। मोरङ–सुनसरी औद्योगिक क्षेत्रमा ७ सयभन्दा बढी  रोजगारदाता भएको तथ्यांक छ।

नेपालको कानुनी व्यवस्थाअनुसार २५ जनाभन्दा बढीलाई रोजगार दिने व्यक्तिले २५ मा १ जना अपाङ्गता भएका व्यक्तिलाई रोजगारी दिनुपर्ने हुन्छ। तर यो कानुनी प्रावधानलाई अधिकांश रोजगारदाताले कार्यान्वयनमा ल्याएका छैनन्।

मेलाको नारा ‘रोजगारीमा अपाङ्गता भएका व्यक्ति नछुटौं, राष्ट्रनिर्माणमा सबै जुटौं' रहेको छ।  

द लेप्रोसी मिसनका विपिन दासले मेलामा अपाङ्गता भएका प्रदेश १ का ८ जिल्लाका ३ सय जनाको बायो डाटा प्राप्त भएको उल्लेख गरे । दासले बायोडाटा प्राप्त हुने सबैको उपस्थितिका लागि आयोजकले पहल गरिरहेको बताए। 

बायोडाटा दिने अपाङ्गमा मोरङ, सुनसरी, झापा, धनकुटा, सङ्खुवासभा, भोजपुर र इलाम जिल्लाका छन्। उनीहरू निरक्षरदेखि स्नातकोत्तर सम्म पढेका छन्।

मेलामा ८ जिल्लाबाहेकह तेह्रथुम, सोलुखुम्बु र काठमाडौँका अपाङ्गता भएका व्यक्तिले पनि बायोडाटा पठाएका छन् र उनीहरूलाई पनि सहभागी बनाउने प्रयास भइरहेको छ।

दासका अनुसार मेलामा छानिएका अपाङ्गले टिचिङ, म्यानुफ्याक्चरिङ, हस्पिटालिटी, गार्मेन्ट, हेल्थ, बैंकर, डेभलपमेन्ट पार्टनर र घरेलु तथा साना उद्योगका क्षेत्रमा काम पाउने छन्। 

रोजगारीका लागि छानिएका अपाङ्गता भएका व्यक्तिलाई आवश्यक काउन्सिलिङ र क्षमता अभिवृद्धि गराएर मात्र काममा पठाइनेछ।