सरुवा भएका अधिकृतसहित दुई ठेकेदारविरुद्ध भ्रष्टाचार मुद्दा, २ करोड २० लाख चुहावट आरोप

काठमाडौं। बाराको जितपुर सिमरा उपमहानगरपालिका पूर्व प्रमुख प्रशासकीय अधिकृत र ढुंगा, गिट्टी, बालुवा ठेक्का लिने दुई फर्मका सञ्चालकविरुद्ध राजस्व हिनामिना गरी भर्ष्टाचार गरेको आरोपमा अख्तियार अनुसन्धान आयोगले विशेष अदालतमा मुद्दा दायर गरेको छ।

हाल सरुवा भएर वाणिज्य विभागमा रहेका जितपुर-सिमरा उपमहानगरपालिकाका पूर्व प्रमुख प्रशासकीय अधिकृत शिवराज सेढाई, हेटौंडाको न्यू पाथिभरा सप्लायर्सकी सञ्चालक मीनाकुमारी श्रेष्ठ र ओम सप्लायर्सका सञ्चालक ओमशंकर प्रसादविरुद्ध मुद्दा दायर गरेको हो।

सेढाईविरुद्ध दुईटा आरोपपत्र दायर भएको छ। एउटामा २ करोड २० लाख रुपैयाँको रकम चुहावट गरेको आरोप छ। 

बालगंगा खोलाबाट खोलाजन्य पदार्थ उत्खनन र संकलन गरी न्यू पाथिभरा सप्लायर्स हेटौंडा-४ मकवानपुरसँग सम्झौता गर्दाको बखत दुई किस्ताबापत हुन आउने रकम ठेकेदार कम्पनीबाट कार्य सम्पादन जमानत नलिई सम्झौता गरेको आरोप आयोगको छ। यसले गर्दा १ करोड २० लाख २८ हजार रुपैयाँ राजस्व चुहावट भएको देखिएकाले भ्रष्टाचार गरेको आरोपपत्रमा उल्लेख छ। 

आयोगले न्यू पाथिभराकी सञ्चालक श्रेष्ठलाई १ करोड ६६ लाख ७२ हजार ६ सय रुपैयाँ अनियमितता आरोप लगाएको छ। आयोगले सेढाईविरुद्ध दायर अर्को आरोपपत्रमा जीतपुर-सिमराको पसाहा खोलाको ठेक्कामा ठेकेदारसँग मिलेमत्तो गरी राज्यको स्रोत साधनको दोहन गरेर ९९ लाख ९९ हजार ९९ रुपैयाँ राजस्व चुहावट गरेको उल्लेख छ।

ओम सप्लायर्सका सञ्चालक ओमशंकरविरुद्ध १ करोड ३८ लाख ९९ हजार रुपैयाँ भष्टाचार गरेको आयोगको मागदाबी छ। मुद्दा शुक्रबार दायर भएको हो।