काठमाडौं । चाडपर्वले भारतमा प्याजको मूल्य महंगिएपछि यसको असर स्थानीय बजारमा परेको छ । कालीमाटी तरकारी बजारमा प्याजको मूल्य प्रतिकेजी ७५ रुपैयाँ देखी ८० रुपैयाँ तोकिएको छ । असोजमा प्रतिकेजी ४६ रुपैयाँमा बिक्री भएको प्याज यति बेला बढेर प्रतिकेजी ८० रुपैयाँसम्म पुगेको हो । एक महिनामै प्याजको मूल्य प्रतिकेजी ३५ रुपैयाँले बढेको छ ।
भारतीय बजारमा मूल्य प्याजको मूल्य बढ्न थालेको कालीमाटी फलफूल तथा तरकारी बिकास समितिले जनाएको छ। अफसिजन सँगै चाडपर्वले भारतीय बजारमा प्याज महंगो भएको समितिका सुचना अधिकारी विनय श्रेष्ठले बताए ।
चाडपर्वमा हरिया तरकारीको मूल्य बढ्ने गरेको थियो । प्याज नभइ नहुने तरकारी होइन । तर प्रयोग गरिरहेको उपभोक्ताले मूल्य बढेपनि खरिद गर्न छोड्दैनन् । यसले गर्दा चाडपर्वमा बजारमा प्याजको मूल्य बढ्दा उपभोक्ता थप मारमा पर्न थालेका छन् ।
प्याजको मूल्य भारतीय बजारसँग निर्भर रहेको छ । उता मूल्य बढे यहाँ पनि बढ्छ ।यति बेला भारतबाट दैनिक ८० देखि एक सय टनसम्म प्याज आयात हुँदै आएको छ। कुनै समय आयात कम हुँदा मूल्य बढ्ने गरेको थियो । बजारमा खपत कम भएपनि भारतीय बजारका कारण प्याजको मूल्य प्रतिकेजी ८० रुपैयाँ थोकमै पर्न थालेको उनले जानकारी दिए।
हरेक वर्ष चाडपर्वको समयमा प्याजको मूल्य बढ्ने गरेको छ । अहिले आयात कम भएर प्याजको मूल्य बढेको होइन । भारतमा प्याजको मूल्य एक सातामा प्रतिकेजी २० रुपैयाँसम्म बढेको पाइएको छ । यसले गर्दा स्थानीय बजारमा पनि प्याजको मूल्य लगातार बढिरहेको हो।
'अबको केही समय प्याजको मूल्य केही बढ्छ 'उनले भने । नयाँ उत्पादन आउन अझै केही समय लाग्ने हुनाले मूल्य महंगिन सक्ने सम्भावना छ । यति बेला चाडपर्वसँगै होटल रेष्टुरेन्टहरु खुलेपछि प्याजको खपत थप बढाएको छ ।
भारतीय बजारमानै प्याजको माग धेरै हुने गरेको छ । उत्पादन कम र माग धेरै भएकोले केही वर्षदेखि प्याजको मूल्यमा उतारचढाव भइरहेको छ । उताबाट मूल्य घटेर आएमात्र स्थानीय बजारमा प्याजको मूल्य घट्ने हो । नयाँ सिजन सुरु भएपछि मात्र प्याजको मूल्य घट्ने सुचना अधिकारी श्रेष्ठले बताए। गत वर्ष फागुनमा प्याजको मूल्य प्रतिकेजी ८५ रुपैयाँ पुगेको थियो । नयाँ सिजन सुरु भएपछि मूल्य घट्दै प्रतिकेजी ३५ रुपैयाँसम्म उपभोक्ताले खरिद गरेका थिए ।
हाल बजारमा बिक्री भइरहेको प्याज सबै आयातित प्याज हो स्वदेशी उत्पादन प्याजले थोरै समयमात्र माग धान्ने गरेको छ । जसले गर्दा नेपालमा बर्षेनी २ अर्ब भन्दा बढी रुपैयाँको प्याज भारतबाट मात्र आयात हुने गरेको छ ।