नबिल बैंकले युनाइटेड फाइनान्स प्राप्ति गर्ने, युनाइटेडको १ सेयरबराबर नबिलको ०.३५ कित्ता

काठमाडौं। नबिल बैंकले युनाइटेड फाइनान्स एक्वायर गर्ने भएको छ। बैंकले शुक्रबार प्राप्तिका लागि युनाइटेडसँग एमओयूमा हस्ताक्षर गरेको छ। नबिलका मर्जर संयोजक उदयकृष्ण उपाध्याय र युनाइटेडका मर्जर संयोजक मनिष खेम्काले सम्झौतापत्रमा हस्ताक्षर गरे।

बैंक स्रोतका अनुसार नबिलले युनाइटेडलाई १:०.३५ को स्वाप अनुपातमा प्राप्ति गर्न लागेको हो । अर्थात्, प्राप्तिपछि युनाइटेड फाइनान्सको सय कित्ता सेयरबराबर नबिलको ३५ कित्ता कायम हुनेछ ।

नबिल बैंकले पहिलोपटक संस्था प्राप्ति गर्न लागेको हो। नबिल र युनाइटेड दुवै विदेशी संयुक्त लगानीका वित्तीय संस्था हुन्।

नबिलमा ५० प्रतिशत लगानी विदेशी छ भने युनाइटेडमा भारतको मुथूट फाइनान्सको लगानी छ।   

नबिलमा जस्तै युनाइटेडमा पनि चौधरी समूहको लगानी छ। युनाइटेडमा वसन्त चौधरीको लगानी छ।