.png)
काठमाडौं। नेपाल विद्युत प्राधिकरणले निर्माण गरिरहेको मर्स्याङ्दी करिडोर २२० केभी प्रसारणलाइन आयोजनामा पर्ने जग्गाको मुआब्जा लिन जग्गाधनीहरुलाई सार्वजनिक सूचना प्रकाशन गरेको छ।
उक्त आयोजना अन्तर्गत उदीपुर-भरतपुर खण्डको लमजुङमा पर्ने जग्गाको मुआब्जा लिन जिल्ला प्रशासन कार्यालय लमजुङमार्फत सूचना जारी गरेको हो।
प्रसारण लाइनको 'राइट अफ वे' मा पर्ने टावरबाट दायाँ बायाँ १५/१५ मिटरले छुने जग्गाको क्षतिपूर्ति दिन लागिएको हो।
लमजुङमा पर्ने साबिकका गाविसहरु उदीपुर, चिति, अर्चलबोट, भारते, भोटेओडार,सुन्दरबजार, तार्कुघाट र धमिलिकुवा अन्तर्गतका जग्गाधनीहरुले आफूले हकभोग गरिरहेको प्रमाणसहित सम्पर्क राख्न जिल्ला प्रशासनले आग्रह गरेको छ।
यसका साथै सार्वजनिक सूचना जारी भएपछि प्रसारणलाइनको मार्गमा भौतिक संरचना नबनाउन र रुख बिरुवाहरु नरोप्न पनि प्रशासनले आग्रह गरेको छ।
सूचनालाई अटेर गरि कसैले जबर्जस्ती भौतिक संरचना बनाएमा त्यसबाट हुने क्षतिको जिम्मेवार पनि स्वयम् जग्गाधनी नै हुने प्रशासनले जनाएको छ।
