इटहरीको इपी पार्क संचालनमा, वृद्ध र बालबालिकालाई निःशुल्क, विद्यार्थीलाई छुट

विराटनगर। सुनसरीको इटहरीमा सोमबार इपी ल्यान्ड एन्ड वाटर पार्क सोमबारदेखि संचालनमा आएको छ। पार्कका सञ्चालक विनोद पौडेलका अनुसार सर्वसाधारणका लागि पार्कको प्रवेश शुल्क ७ सय ५० र विद्यार्थीका लागि ६ सय ५० रुपैयाँ तोकिएको छ।

त्यस्तै ३ फिट माथिका बालबालिकाका लागि ४ सय निर्धारण गरिएको छ। सत्तरी वर्ष माथिका वृद्ध र ३ फिटभन्दा होचा बालबालिकाले पार्कको अवलोकन निःशुल्क गर्न पाउने छन्। जिपलाइन, एडभेन्चर पार्क, सुमो रेसलिङ र बडी जर्बको प्रति व्यक्ति एक हजार रुपैयाँ शुल्क राखिएको छ।

जम्बो प्याकको शुल्क प्रति व्यक्ति १ हजार ५ सय कायम गरिएको छ। जम्बो प्याकको टिकट खरिद गरेपछि प्रवेशका लागि छुट्टै टिकट लिइरहनु पर्दैन। जम्बो प्याकको टिकटबाट हाल पार्कमा रहेका ६ वटै खेल, एम्युजमेन्ट पार्क, जिपलाइन, वाल क्लाइम्बिङ, एडभेन्चर पार्क, सुमो रेसलिङ र बडी जर्बको रमाइलो गर्न पाइने छ।बिहान १० देखि साँझ ६ बजेसम्म खुला रहने यस पार्कमा प्रवेश गरेपछि यहाँभित्र ६ घण्टासम्म बस्न पाइनेछ।

सञ्चालक विनोदले पार्कले ३ महिनापछि स्नोपार्क पनि सञ्चालनमा ल्याउने जानकारी दिए। कोभिडका कारण जर्मनीबाट इन्जिनियर समयमा आउन नपाएका कारण स्नोपार्क तत्काल तयार हुन नसकेको उनको भनाइ छ। प्रहरीका २ पूर्व उच्च अधिकारीसहित ४ जनाको कुल ३० करोड लगानी छ।