१६ दिनपछि वीरगंज भन्सारमा आलोपालो सामान जाँचपास हुँदै ,कोरोनाले आयात निर्यात प्रभावित

वीरगंज। पर्सामा पछिल्लो पटक फैलिएको कोरोना महामारीका कारण वीरगंज नाकाबाट भित्रिने समान तथा निर्यात हुने मालवस्तुको आयात निर्यातमा प्रतिकूल असर परेको छ ।

वीरगंजमा संक्रमण बढ्दै जाँदा भन्सारको आयात निर्यात एकदमै प्रभावित भएको भन्सार अधिकारीहरुले बताएका छन् ।

वीरगंजमा निषेधाज्ञा जारी भएको १६ औं दिन अर्थात आइतबारदेखि मात्रै वीरगंज भन्सार र ड्राइपोर्ट भन्सार नाकालाई सहज बनाउन प्रयास शुरु भएको छ ।

शनिबार बसेको संकट व्यवस्थापन केन्द्र पर्साको बैठकमा वीरगंज भन्सार अन्तर्गत पुरानो भन्सार र एकीकृत जाँच चौकी(आइसिपी) भन्सार नाकाबाट मालसमान भित्र्याउन भन्सार एजेन्टहरुलाई आलोपालो प्रणालीबाट सेवा दिने निर्णय भएको वीरगंज भन्सारले जनाएको छ ।

आइतबार, मंगलबार र  बिहीबार २१ जना भन्सार क्लियरिङ एजेन्टको समान जाँचपास गर्ने व्यवस्था मिलाइएको छ ।

यस्तै सोमबार, बुधबार र शुक्रबारका  तीन दिन १५ जना एजेन्टको समान जाँचपास गर्ने जानकारी सर्कुलर भएको वीरगंज उद्योग वाणिज्य संघका अध्यक्ष गोपाल केडियाले जानकारी दिए ।

सोही अनुसार वीरगंजका तीन भन्सार नाकाबाट मालसमान आयात हुने बताइएको छ । उनले यो नियम ड्राइपोर्ट भन्सारको बोराबन्द गोदाममा भने लागू नहुने बताए।