कोरोना संक्रमितको संख्या बढेसँगै घट्न थाल्यो सेयर बजार, आइतबार मात्रै ४२.७८ अंक ओरालो

काठमाडौं।  कोरोना भाइरसका संक्रमित थपिदै गएपछि सेयर बजार पनि घट्दै गएको छ ।

साताको पहिलो दिन आइतबार सेयर बजार ४२.७८ अंक घटेर १ हजार ३ सय ९६.२८ विन्दुमा बन्द भएको छ । १ हजार ४ सय ४१.२६ विन्दुबाट सुरु भएको नेप्से सो विन्दुभन्दा माथि नगई निरन्तर घटेर बन्द भएको छ । 

कोरोना संक्रमितहरुको संख्या घट्दै गएपछि लकडाउन केही खुकुलो भए पनि हाल संक्रमितहरु थपिदै गएपछि बजार घट्न पुगेको लगानीकर्ताहरु बताउँछन् । कोरोना  संक्रमितहरु बढ्दै गएमा फेरि लकडाउनको अवस्था आउला र बजार  बन्द होला भन्ने अनुमानमा लगानीकर्ताहरुले भएको नाफालाई सुरक्षित गरेको एक लगानीकर्ताले बताए । 

नेपालमा पुन: साउन २० गतेदेखि लकडाउन हुने भन्ने हल्ला ब्रोकर कार्यालयमा चलेको छ। लगानीकर्ताहरुले सेयर बजार अझै घट्ला भनेर भएको सेयर बिक्रीमा लागेको एक ब्रोकरले बताए । लकडाउन भइहाल्यो भने सेयर बिक्री गर्न नपाउने र त्यसपछि बजार घट्ने अनुमान लगानीकर्ताहरुले गर्दा बजार घट्न पुगेको ती ब्रोकरले बताए । 

आइतबार १ सय ८९ कम्पनीको ४६ लाख ६१ हजार ६ सय ८ कित्ता सेयरको १ अर्ब ८४ करोड १२ लाख माथिको सेयर कारोबार भएको छ ।

कारोबार भएका १२ वटै उपसमुहको सूचक घट्न पुगेको छ । अघिल्लो साता सबैभन्दा बढी वाणिज्य बैंकहरुको सेयर मूल्य बढेको थियो । हालको बजार विन्दुमा नै केही प्रतिशत नाफा भएपछि लगानीकर्ताहरु नाफा बुकिङमा लागेका हुन्।

बैंकिङ समूहको ३.३५, होटलको ४ दशमलव ४९, बीमा  र लघुवित्तको सूचक पनि ३ प्रतिशत माथि घटेको छ । गत सातामा उच्चले बढेको होटलका सेयर यस दिन उच्चले नै घटेको छ । 

एकीकृत कारोबारपछि दोस्रो बजारमा हालै कारोबार सुचारु भएको आरम्भ चौतारीको सेयर मूल्य ९.९८ प्रतिशत बढेको छ । त्यस्तै, म्याचिङ कारोबार नभएर चार दिनदेखि कारोबार हुन नपाएको अजोड इन्स्योरेन्सको दोस्रो बजारमा आजदेखि कारोबार भएको छ ।

पहिलो दिनको कारोबारमा कम्पनीको सेयर मूल्य ९.९६ प्रतिशत बढेको छ भने आठ वर्षको साधारण लिएर हकप्रद प्रस्ताव गर्दै साधारण सभा बोलाएको नेपाल फाइनान्सको सेयर मूल्य पनि ९.६२ प्रतिशत बढेको छ । घट्नेमा जोशी हाइड्रोपावर, ओरियन्टल होटल र हिमालयन ऊर्जा विकास कम्पनी छन् । 

नेपाल पुनर्बीमा कम्पनीको सर्वाधिक २२ करोड ६५ लाख १७ हजार माथिको सेयर कारोबार भएको छ ।