काठमाडौं। साउन १६ गतेदेखि निष्कासन तथा बिक्री खुला भएको एनआरएन इन्फ्रास्टक्चर एण्ड डेभलपमेण्ट कम्पनीको आइपिओमा साउन १८ गते बिहान १० बजेसम्म ५२ लाख ६८ हजार ४ सय २० कित्ताको लागि आवेदन परेको छ ।
सानिमा क्यापिटलका अनुसार आइतबार विहानसम्म १ लाख ३० हजार ३ सय १ जनाले आवेदन दिएका हुन् ।
कम्पनील ३१ लाख ६० हजार १ सय ८३ कित्ता आइपिओ विक्री खुला गरेको हो । लगानीकर्ताहरुले आइपिओ छिटोमा साउन २१ गते र ढिलोमा तथा आइपिओ बिक्री नभएमा भदौ ५ गतेसम्म आवेदन दिन सक्ने बताइएको छ ।
आवेदकहरुले न्युनतम १० कित्ता र अधिकतम सम्पूर्ण कित्ताको लागि आवेदन दिन सक्नेछन् ।
काठमाडौंको चाबहिलमा केन्द्रीय कार्यालय रहेको कम्पनीको प्रबर्द्धकमा गैरआवासीय नेपाली संघका पूर्व अध्यक्षहरु उपेन्द्र महतो, जीवा लामिछाने, शेष घले, भवन भट्ट र बर्तमान अध्यक्ष कुमार पन्त लगायत संघका अरु केही प्रमुख अभियन्तासहित झन्डै आठ सय जना गैरआवासीय नेपालीहरु रहेका छन् । सन् २०१२ मा स्थापना भएको यो कम्पनीको जलविद्युत लगायत ठुला विकास आयोजनमा लगानी गर्ने उद्देश्य लिएको जनाएको छ ।
कम्पनी आफैँमा जलविद्युत कम्पनी नभएकाले कम्पनीको आइपिओमा लगानी गर्दा घाटा नहुने लगानीकर्ता अम्बिका प्रसाद पौड्यलले बताए । कम्पनीले लाभांश दिन केही वर्ष लागेपनि हालका जलविद्युत कम्पनी भन्दा राम्रो रहेको उनको भनाई छ ।
उनका अनुसार ‘सुशासनको हिसाबले राम्रो कम्पनी हो । कसैले पैसा अपचलन गर्छ भन्ने छैन । कम्पनीले प्रतिफल कम दिएपनि जोखिम लिनहुन्न भन्ने मुख्य उद्देश्य कम्पनीको हो ’। त्यसो हुनाले आइपिओमा लगानी गर्न हुँदैन भन्ने होइन । कम्पनीको मुल्य धेरै चार , पाँच सय आउला भन्ने पनि होइन । कम्पनीले प्रतिफल दिन केही समय लाग्छ ।
बजारमा जुन सुकै कम्पनीको सेयरमा जहिलेपनि जोखिम हुन्छ । उनले भने‘ सेयर बजार भनेकै जोखिक हो ’ । आजको दिनमा लगानीकर्ताहरुले हेर्दा गैरआवसीयहरुले पाँच सात वर्षदेखि लगानी गरेको कम्पनीका आज एक सय रुपैयाँमा लगानी गर्नु पाउनु राम्रो भएको उनको भनाई छ ।
कम्पनीको संचालक समितिमा जीवा लामिछाने, शेष घले, महेश श्रेष्ठ लगायत प्रतिष्ठित गैर आवासीय ब्यक्तित्व रहेकाले कम्पनी घाटामा जाला भन्ने आफुलाई नलागेको उनी बताउँछन् ।
कम्पनीको अधिकृत पुँजी ५ अर्ब र जारी पुँजी १ अर्ब १३ करोड २६ लाख ८२ हजार रहेको उक्त कम्पनीको चुक्ता पुँजी ७९ करोड २८ लाख ७७ हजार ५ सय रुपैयाँ छ ।
कम्पनीले आइपिओ बिक्री गरी ३३ करोड ९८ लाख ४ हजार ६ सय रुपैयाँ संकलन गर्ने छ । उक्त रकम पछि कम्पनीको चुक्ता पुँजी १ अर्ब १३ करोड २६ लाख ८२ हजार पुग्नेछ ।
कम्पनीले आईपिओबाट उठेको रकम विभिन्न ३ वटा जलविद्युत आयोजनामा लगानी गर्ने जनाएको छ । कम्पनीले आईपिओबाट उठेको रकम २१.३० मेगावाटको ठूलो खोला हाइड्रो, ५६ मेगावाटको जुम खोला हाइड्रो र ५३.५३ मेगावाटको मिडिल कालीगण्डकी हाइड्रोमा लगानी गर्न लागेको हो । ठूलो खोला र मिडिल कालीगण्डकी म्याग्दीमा रहेको आयोजना हो भने जुम खोला आयोजना दोलखामा अवस्थित छ । जुम खोला आयोजनाको डेभलपर सानिमा हाइड्रो हो।
लगानीकर्ता पौड्यलका अनुसार कम्पनीले मुलरुपमा दीर्घकालीन प्रतिफल दिने जलबिद्युत क्षेत्रमा लगानी गरेको छ । आइएमई ग्रुपसंगको साझेदारीमा लमजुंग जिल्लाको दोर्दिखोलामा लगानी गरेको २७ मेगावाट जलबिद्युत परियोजना यसै बर्ष मंसिर महिनामा सम्पन्न भई आगामी बर्ष देखी प्रतिफल प्राप्त हुने उनले बताए ।
सानीमा ग्रुपद्वारा निर्माण भइरहेका अन्य तीन योजनाहरु ७३ मेगावाटको मिडिल तमोर, २८ मेगावाटको लिखु र १४ मेगावाटको मैलुंग खोला भने सन् २०२१ र २०२२ मा सम्पन्न हुने योजनाहरु हुन् ।
सानिमा ग्रुप जलबिद्युत क्षेत्रमा भरोसा गर्न सकिने कम्पनीका रुपमा आफ्नो पहिचान बनाएकोले उल्लेखित योजनाहरु समय मै सम्पन्न हुनेछन् भनेर आशा गर्न सकिने उनको भनाई छ । आगामी दिनमा अन्य क्षेत्रहरुमा समेत लगानी विस्तार गर्दै जाने कुरा कम्पनीले बताएका कारण कम्पनीको आइपिओमा लगानी गर्दा फरक नपर्ने उनले बताए ।
धितोपत्र बोर्डले निजी क्षेत्रका इन्भेस्टमेन्ट कम्पनीलाई प्राथमिक शेयर निष्काशन गर्न दिएको यो पहिलो कम्पनी हो । नियामक निकायद्वारा यस्ता कम्पनीहरुले प्राथमिक शेयर निष्काशनका लागि पूरा गर्नुपर्ने क्राइटेरियाहरु सम्पन्न गरेकोले मात्रै सोको अनुमति दिएको हो। 'त्यसैले कम्पनीको अवस्था राम्रो छ भन्ने बुझिन्छ ।'- उनले भने ।
कम्पनीले आव २०७५/७६ सम्म १ करोड ६३ लाख १९ हजार नाफा गरेको छ । कम्पनीले आव २०७८/७९ सम्म ४ करोड ९४ लाख ४७ हजार नाफा कमाउने प्रक्षेपण गरेको छ । आव २०७५/७६ सम्म कम्पनीको प्रतिसेयर आम्दानी २.०४ रहेको छभने प्रतिसेयर नेटवर्थ १ सय २ रुपैयाँ ०६ पैसा रहेको छ ।
कम्पनीको आइपिओलाई केयर रेटिङ नेपालले एनपी ग्रेड ‘४’ दिएको छ । यसले कम्पनीको वित्तीय अवस्था औसत भन्दा कमजोर आधार जनाउँदछ ।