मदिरा पसलमा लामो लाइन भएपछि दिल्ली सरकारले लगायो ‘कोरोना कर’, मदिराको मूल्य ७०% ले बढ्यो

काठमाडौं। सोमबारदेखि भारतमा लकडाउनको तेस्रो चरण सुरु भएको छ। लकडाउन निरन्तर हुन थालेपछि भारतीय सरकारले विभिन्न क्षेत्रमा छुट पनि दिन थालेको छ। यसै सन्दर्भमा मदिरा पसल पनि खोल्न छुट दिइएको छ।

सोमबार जसै मदिरा पसल खुल्यो, मानिसहरुको लामो लाइन पसल अगाडि लाग्यो। मदिरा पसलमा लागेको लामका बारेमा मंगलबारका सबै पत्रपत्रिकाहरुले महत्वपूर्ण स्थान दिए। 

मानिसहरुको लामो लाइन लागेपछि दिल्ली सरकारले नयाँ उपाय निकालेको छ। दिल्ली सरकारले मदिराको खरिदमा 'कोरोना शुल्क' भनेर नयाँ शीर्षकमा कर लगाइदिएको छ। अहिलेको प्रचलित मूल्यमा तथप ७० प्रतिशत कोरोना शुल्क दिल्ली सरकारले लगाइदिएको हो।

सोमबार अन्य पसलहरु पनि खुलेका थिए। तर ती पसलमा चहलपहल खासै थिएन। मदिरा पसलमा भने एक/दुई किलोमिटरकै लाइन थियो। केन्द्र सरकारले घरबाट ननिस्कनु भनेपनि मदिरा किन्नका लागि सर्वसाधारण निस्किएका थिए। भिड नियन्त्रणका लागि पनि मूल्य बढाउन आवश्यक भएको भन्दै दिल्ली सरकारले शुल्क थोपरिदिएको हो।