निजी गाडी किन्न ऋण खुकुलो पारिँदै, अर्थमन्त्रीले भने- ‘राष्ट्र बैंकलाई निर्देशन दिइसकेका छौं’

काठमाडौं। निजी सवारीसाधन ऋणमा गरिएको कडाइलाई खुकुलो पार्न अर्थमन्त्रालयले राष्ट्र बैंकलाई निर्देशन दिएको छ। ऋण कडाइले सवारी आयातमा कमी आएर राजस्व संकलनमै असर गरेपछि अर्थले सवारी कर्जा खुकुलो पार्न निर्देशन दिएको हो।

चालु आर्थिक वर्षको ६ महिनामा भन्सार महसुल गत वर्षभन्दा कम असुली भएपछि सवारी आयात बढाउने रणनीति अर्थले लिएको हो। सवारीको डाउन पेमेन्ट बढाउन राष्ट्र बैंकलाई निर्देशन दिइसकेको अर्थमन्त्री डा. युवराज खतिवडाले जानकारी दिए। नेपाल समुद्रपार निकासी पैठारी संघको ४० औं साधारण सभामा मन्त्री खतिवडाले भने-‘हामीले सवारीको डाउनपेमेन्ट बढाउन राष्ट्र बैंकसँग आग्रह गरिसकेका छौं। अब मिल्नेसम्म डाउन पेमेन्ट घटाउन राष्ट्र बैंकले काम थाल्नेछ।‘

अहिले ३० लाखको गाडी किन्नु पर्‍यो भने १५ लाख ग्राहक आफैंले हाल्नु पर्छ। बाँकी १५ लाख रूपैयाँ मात्र बैंकले ऋण दिन्छन्। पहिले ८० प्रतिशतसम्म बैंकले ऋण दिन्थे।

यसरी डाउन-पेमेन्टमा कडाइ गरेपछि सवारीसाधन खरिदका लागि ऋणमा कमी आएको थियो। गाडी बिक्न छाडेपछि ब्यवसायीले आयात गर्न पनि छाडेका थिए। यही कारण राजस्वमा उल्लेख्य कमी आएपछि सरकारले केही खुकुलो हुन आग्रह गरेको हो।

राष्ट्र बैंकले बैंकहरूले ऋण दिने सीमा ५० प्रतिशतलाई बढाएर ६५ देखि ७० प्रतिशतसम्म पुर्‍याउने तयारी गरेको छ।