काठमाडौं। नेपाल विद्युत प्राधिकरणले बालाजु सवस्टेसनमा नयाँ ट्रान्सफर्मर जडानको लागि भोलि बालाजु औद्योगिक क्षेत्रदेखि महाराजगञ्ज सम्मको विद्युत आपूर्ति अवरुद्ध पार्ने भएको छ।
काठमाडौ उपत्यकाको विद्युत आपूर्तिलाई विश्वसनीय बनाउन बालाजु सवस्टेसनमा ६६/११ केभीको २२.५ एमभीए क्षमताको नयाँ ट्रान्सफर्मर राख्न लागिएको प्राधिकरणले जनाएको छ।
नयाँ ट्रान्सफर्मर राख्नको लागि भोलि बिहान ११:३० बजेदेखि अपरान्हः १५:३० बजे सम्म उक्त सवस्टेशनबाट बिस्तारित फिडरहरू सट डाउन गर्न लागिएको प्राधिकरणले जनाएको छ।
बालाजु सवस्टेसनबाट विद्युत आपूर्ति भएका बालाजु औद्योगिक क्षेत्रका फिडर १ र २, ढुंगेधारा फिडर, महाराजगञ्ज-२ नम्बर फिडर, नयाँबजार फिडर र धर्मस्थली फिडरबाट भोलि दिउँसो विद्युत आपूर्ति अवरुद्ध हुने भएको नेपाल विद्युत प्राधिकरणले जनाएको छ।