काठमाडौं । एक अर्ब बौद्धमार्गीमध्ये एक प्रतिशतलाई नेपाल ल्याउने महत्वाकांक्षा राख्ने ललितमण्डप टुर्स एण्ड ट्राभल्सका सञ्चालक सुरज शाक्य बैंकको ऋण तिर्न नसकेपछि कालोसूचीमा परेका छन् ।
तीन वर्ष अघि ठूलै ‘पब्लिसिटी’का साथ ललितमण्डपको ‘रिब्राण्डिङ्ग’ गरेका शाक्यसहित उनकी श्रीमती जेनी कर्मचार्य शाक्य पनि कालोसूचीमा परेकी हुन् । पाटन फाइनान्सका पूर्व अध्यक्ष रहेका शाक्यले त्यही फाइनान्सबाट ऋण पनि लिएका छन् । उनलाई पाटन फाइनान्सको सिफारिशमा कर्जा सूचना केन्द्रले कालोसूचीमा राखेको हो ।
यस अघि २०६८ चैतमा पनि शाक्यलाई कर्जा सूचना केन्द्रले कालोसूचीमा राखेको थियो । शाक्य कालोसूचीमा परेपछि वेपत्ता छन् । ललितमण्डप टुर्स एण्ड ट्राभल्स सन् १९९५ मा तीन जनाको साझेदारीमा सुरु गरिएको थियो । १२ लाख रुपैयाँको लगानीमा स्थापना गरिएको ललितमण्डपको चुक्ता पुँजी एक करोड रुपैयाँ पुगेको छ । आक्रमक ढंगले बजार विस्तार सुरु गरेपछि कम्पनी समस्यामा परेको थियो ।
ललितमण्डपले नेपालीलाई थाइल्याण्ड, सिंगापुर, मलेसिया लगायतका देशमा घुमाउने योजना सुरु गरेको थियो । आक्रमक बजार विस्तारले कम्पनी समस्यामा परेको थियो, त्यसले शाक्यको व्यवसायिक जीवन नै संकटमा पार्यो स्रोतले भन्यो ।
उता डन गणेश लामाको ‘क’ वर्गको कन्ष्ट्रक्सन कम्पनी सिरुवा कन्ष्ट्रक्शन पनि कालोसूचीमा परेको छ । कम्पनीलाई सनराइज बैंकले लामाको सिरुवा कन्ष्ट्रक्शनलाई कालोसूचीमा राखेको हो । यस अघि लामाको मेलम्ची कोन क्रसर उद्योग पनि कालोसूचीमा परेको थियो । सम्पत्ती शुद्धिकरण विभागले लामाको सम्पत्ती छानविनका लागि फ्रिज गरेपछि उनले ऋणको साँवा व्याज भुक्तानी गर्न सकेका छैनन् ।

काठमाडौं । १२ वर्षपछि विनोद चौधरीले नेपाल उद्योग परिसंघ(सिएनआई)को अध्यक्ष छाड्ने भएका छन् । नेपाल उद्योग वाणिज्य महासंघमा दोस्रो कार्यकालको अध्यक्षका लागि पद्म ज्योतीसँग पराजय भएपछि चौधरीले सिएनआई गठन गरेका थिए । १७ अप्रिल २००० मा सिएनआई गठन भए यता उनी लगातार अध्यक्ष छन् ।
परिसंघ स्थापना भएपछि लगातार अध्यक्ष रहेका चौधरीले आज अध्यक्ष पद छाडनेछन् । परिसंघको आज दिउँसो बस्न लागेको विशेष साधरणसभामा चौधरीले अध्यक्ष पद त्यागको घोषणा गर्दैछन् । उनी त्यसपछि सिएनआईमा ‘इमिरेट्स प्रेसिडेन्ट’का रुपमा रहने स्रोतले जानकारी दियो ।
विशेष साधरणसभामा प्रथम अध्यक्षलाई इमिरेट्स प्रेसिडेन्टको प्रस्ताव गर्दै सिएनआईको नियमावली संसोधन प्रस्ताव गरिएको छ । विशेष साधारणसभामा इमिरेट्स प्रेसिडेण्टको प्रस्तावलाई महत्वपूर्ण एजेण्डाको रुपमा राखिएको छ ।
संस्थामा लगातार एउटै अध्यक्ष रहँदा वाहिर छबि नराम्रो हुने देखेपछि चौधरीले अध्यक्ष पद त्याग्न लागेको स्रोतले बतायो । संस्थामा एउटै व्यक्ति लगातार अध्यक्ष हुँदा वाहिर राम्रो सन्देश गएन । त्यसैलाई ध्यानमा राखेर विनोदबाबुले अध्यक्ष पद छाड्न लाग्नुभएको हो,’ स्रोतले भन्यो, ‘यसले परिसंघलाई अझ बलियो बनाउँछ ।’
उनका अनुसार चौधरीलाई मानार्थ दिएर परिसंघको अध्यक्षमा पदाधिकारीमध्येबाट बरिष्ठलाई नियुक्त गरिने सम्भावना छ । स्रोतका अनुसार चौधरीकै प्रस्ताव अनुसार मानार्थ अध्यक्ष थपेर संस्थाको पुर्नसंरचना गर्न लागिएको हो । ‘उहाँकै प्रस्ताव अनुसार संस्थालाई पुर्नसंरचना गर्न लागिएको हो,’ ती पदाधिकारीले भने, ‘यसले संस्थालाई अझ फराकिलो बनाउनेछ ।’ परिसंघ स्थापना भएदेखि निर्वाचन प्रक्रियाबाट पदाधिकारी निर्वाचित भएको छैन । परिसंघ अध्यक्षका लागि नरेन्द्र बस्नेत छानिने सम्भावना पक्कापक्कि जस्तै छ ।