वसन्त खड्का/विजमाण्डू
काठमाडौं । नेपाल खाद्य संस्थानले दसैको लागि तीनहजार खसीबोका ल्याउने भएको छ । दसैको समयमा उपभोक्तालाई सहुलियतदरमा खसीबोका बिक्री गर्दै आएको संस्थानले यो वर्ष तीन हजार ल्याउन लागेको हो । यो वर्षपनि हामीले खसीबोका ल्याउँदैछौ, संस्थानका अध्यक्ष आनन्द चन्दले भने, मुलुकभित्रबाटै तीन हजार खसीबोका खरीद गर्दछौ । दसैको बेलामा खसीबोकाको मूल्य नियन्त्रणका लागि संस्थानले खसीबोका ल्याएर बिक्री गर्दै आएको छ ।
विगतको वर्षमा संस्थानले बिक्री गरेको खसीबोकामा विवाद आउने गरेको थियो । यस्तै चाडपर्वमा अत्यावश्वक वस्तु सहुलियत मूल्यमा  बिक्री गर्ने उदेश्यले सुरु भएको सुपथ मूल्य पसलमा उपभोक्ता आर्कषित भएका छन् । ती पसलहरुमा उपभोक्ताको भीड लाग्न थालेको छ । वाणिज्य तथा आपूर्ति मन्त्रालयले साल्ट ट्रेडिङ, नेसनल ट्रेडिङ र खाद्य संस्थानको समन्वयमा मंगलबारदेखि सुपथ मूल्य पसल सञ्चालनमा ल्याएको थियो ।
उपत्यकाको कालिमाटी, टेकु थापाथली, रामशाहपथ, कोटेश्वर तथा ललितपुरको विशालबजार लगायतका स्थानमा सुपथ मुल्य पसलहरु सञ्चालनमा ल्याएको छ ।  
बजार मुल्यभन्दा सस्तो मुल्यमा  दैनिक उपभोग्य सामानहरु  बिक्रिवितरण भएकाले उपभोक्ताको सहभागीता उत्साहजनक रहेको खाद्य सस्थान बागमती अञ्चल प्रमुख दिपक लम्सालले बताए  । सुपथ मुल्य पसलबाट सस्तो मुल्यमा सामान पाएकोमा  उपभोक्ताहरु दङ देखिन्थे । नेसलन ट्रेडिङबाट सस्तो मुल्यमा समान किनिसकेपछि  खुसी व्यक्त गदै  भक्तपुरका विष्णुरत्न नापितले भने सरकारले बाह्रैमहिना यस्ता सुपथ पसलहरुको व्यवस्था गर्न सके हामीजस्तो उपभोक्तालाई राहत हुन्थ्यो ।
उपत्यकामा सञ्चालित सुपथ पसलहरुमा दैनिक उपभोग्य सामानहरु जस्तै दाल चामल, नुन, तेल चिनी आटा दुग्ध पदार्थ, मेसिनरी सामान, ग्यास, मदिरा लगायतका सामग्रीहरु बजार मुल्यभन्दा सस्तोमा पाइन्छ । यो सुपथ मुल्य पसल मंसिर ४ गते सम्म सञ्चालनमा आउनेछ ।  सस्थानले बुधवार सम्ममा उपत्यकाका थापाथली, रामशाहपथ र ललितपुरको विशालबजारमा रहेका सुपथ मुल्य पसलबाट दश लाख रुपैयाँ भन्दा बढीको चामल बिक्री गरिसकेको छ ।  
लम्सालले बुधवार सम्म उपत्यकामा मात्रै दुइसय क्विन्टल  भन्दा बढी चामल बिक्री गरिसकेको बिजमाण्डुलाई जानकारी दिए । सस्थानले उपत्यकामा सञ्चालित सुपथ पसलमा ६ किसिमका चामलहरुमा  किलोमा दुइ रुपैयाँ छुट दिएर बिक्री गरिरहेको छ । बासमति  ६५ रुपैयाँ, ४६ रुपैयाँ, सोना मन्सुली ३४ रुपैयाँ, जापानी चामल ४८ रुपैयाँ, अमेरिकी चामल ४६ रुपैयाँ तथा मकवानपुरे तीस रुपैयाँको दरले बिक्री भइरहेको छ ।

काठमाडौं । डलरको तुलनामा नेपाली मुद्रा शुक्रवार झन बलियो भएको छ । शुक्रवार डलर भारतीय रुपैयाँ ३३ पैसाले अधिमूल्यन भएपछि नेपाली मुद्रा पनि बलियो बनेको हो । भारु बलियो बनेपछि नेपालमा पनि एक डलर खरिद गर्न ८२ रुपैयाँ ८० पैसा खर्च गरे पुग्छ । डलरसँग नेपाली मुद्रा साढे छ महिना यताकै बलियो अवस्था हो ।
शुक्रवार राष्ट्र बैंकले डलरको भाउ ८३ रुपैयाँ नौ पैसा तोके पनि अधिकांश बाणिज्य बैंकले ८२ रुपैयाँ ८० पैसामा कारोवार गरे । सबैभन्दा धेरै डलर विक्री गर्ने इन्भेष्टमेन्ट बैंकले एक डलर खरिद गर्दा ८२ रुपैयाँ ८५ पैसा तोकेको छ भने नबिल, नेपाल एसबीआई लगायतका बैंकले ८२ रुपैयाँ ८० पैसा तोकेका छन् । डलरमा शुक्रवार देखिएको गिरावटसँगै बितेको तीन महिनामा डलर नौ रुपैयाँले सस्तो भएको छ । असार १० गते एक डलर खरिद गर्न राष्ट्र बैंकले ९१ रुपैयाँ ८८ पैसा खर्च गर्नुपर्ने गरी विनिमयदर तोकेको थियो ।
भारतमा शुक्रवारको सुरुवाती कारोवारमा डलरको तुलनामा भारतीय रुपैयाँ ३३ पैसाले बलियो बनेको थियो । विहिवार पनि भारतीय रुपैयाँ डलरसँग ४२ पैसाले बलियो बनेको थियो । विहिवार साँझ भारत सरकारले बीमामा ४९ प्रतिशत र पेन्सन फण्डमा २६ प्रतिशतसम्म विदेशी लगानी स्वीकृत गर्ने कानूनलाई संसदमा पठाउने प्रस्ताव पारित गरेपछि भारतीय मुद्रा बलियो बनेको हो ।
सरकारी निर्णय कार्यान्वयनमा आउने गरी कानून बने एक डलरसँगको भारु सटही दर छिट्टै ५० भन्दा तल जाने विज्ञहरुले दावी गरेका छन् । शुक्रवार सुरुवाती कारोवारमा डलरसँग भारुको सटही ५१ रुपैयाँ ४१ पैसामा भएको थियो । यो दरले डलरसँगको नेपाली मुद्राको सटही दर ८२ रुपैयाँ २५ पैसा हुन्छ । भारतमा भन्दा नेपालमा प्रति डलर ३० पैसा मार्जिन राखेर बाणिज्य बैंकहरुले डलरको विनिमयदर तोक्छन् । यो हिसावले शुक्रवासाँझ वा आइतवारको पहिलो कारोवारमा डलर ८२ रुपैयाँ ५०/५५ पैसाको हाराहारीमा कारोवार हुने पक्कापक्की छ ।