पार्टी टुक्रिएपछि वैद्य प्रचण्ड निवासमा, सम्पत्तिको बाँडफाँड गर्न आग्रह

काठमाडौं । टुक्रिएपछि पार्टी कार्यालय लगायतका विवाद समाधान गर्न एकीकृत माओवादी अध्यक्ष प्रचण्ड र नेकपा–माओवादीका अध्यक्ष मोहन वैद्यवीच आइतवार भेट भएको छ । पार्टी विभाजनपछि फरक पार्टीको अध्यक्षको पहिचानसहित वैद्य पहिलो पटक प्रचण्ड निवास लाजिम्पाट पुगेका हुन् ।
अध्यक्ष वैद्य सचिव देव गुरुङलाई लिएर लाजिम्पाट पुगेका थिए भने पार्टीलाई एकीकृत गर्न पहल गरिरहेका कृष्णबहादुर महराका साथ प्रचण्ड बसेका थिए । चार जनावीच पार्टी विभाजनपछिको अवस्था, केन्द्रिय कार्यालय लगायत विभिन्न जिल्लामा रहेका पार्टी कार्यालयको विभाजन तथा प्रयोगका विषयमा छलफल भएको नेकपा –माओवादीका सचिव गुरुङले जानकारी दिनुभयो ।
दुइ दलवीच यो साता ल्याउनुपर्ने बजेट, भारतीय कम्पनीलाई व्यवस्थापन जिम्मा लगाउन लागिएको त्रिभूवन अन्तराष्ट्रिय विमानस्थल लगायतका विषयमा छलफल भएको थियो । भेटमा दुई दलवीचका विवाद सहमतिमा टुङ्गयाउने गरी छलफल भएको सचिव गुरुङले जानकारी दिनुभयो ।