प्रभु बैंकले सहायक कम्पनीका रुपमा सामूहिक लगानी कोष खरीद गर्दै, नेशनल इन्भेष्टमेन्ट चलाउने

२०७१ माघ २३

काठमाडौं । प्रभु बैंक लिमिटेडले पुँजी बजारमा प्रत्यक्ष हातहाल्ने गरी सामूहिक लगानी कोष कम्पनी सञ्चालन गर्ने भएको छ ।

सहायक कम्पनीका रुपमा बैंकले नेशनल इन्भेष्टमेन्ट एन्ड क्यापिटल मार्केट लिमिटेड सञ्चालन गर्ने भएको हो ।

अहिले नेशनल इन्भेष्टमेन्टले कुनै पनि काम गरेको छैन, यसमा थप लगानी गरेर सञ्चालनमा ल्याउनका लागि हामीले पहल सुरु गरेका छौं ।
—

नेशनल इन्भेष्टमेन्ट धितोपत्र वोर्डबाट कार्य सञ्चालन गर्न स्वीकृति पाइसकेको संस्था हो । तर कम्पनीले अहिलेसम्म कुनै पनि काम गरेको छैन । निस्कृय अवस्थामा रहेको संस्थामा सेयर लगानी थपेर प्रभु बैंकले सञ्चालनमा ल्याउन लागेको हो ।

‘अहिले नेशनल इन्भेष्टमेन्टले कुनै पनि काम गरेको छैन, यसमा थप लगानी गरेर सञ्चालनमा ल्याउनका लागि हामीले पहल सुरु गरेका छौं,’ बैंकका प्रमुख कार्यकारी अधिकृत अशोक शेरचनले बिजमाण्डूसँग भने ।

स्थापनाताका कम्पनीको जारी पुँजी पाँच करोड रुपैयाँ थियो । यसमा संस्थापक सेयरधनीहरुले तीन करोड ३० लाख रुपैयाँ लगानी गरिसकेका छन् । मर्चेन्ट बैंकर र सामूहिक लगानी कोष कम्पनी सञ्चालन गर्न १५ करोड रुपैयाँ आवश्यक पर्ने भएपछि सञ्चालकहरुले यसको जारी पुँजी हालै बढाएका छन् । तर थप रकम भने जम्मा गरेका छैनन् ।

बैंकले बाँकी रकम लगानी गरेर संस्था सञ्चालन गर्न लागेको हो । १५ करोड रुपैयाँको ३० प्रतिशत अर्थात चार करोड ५० लाख रुपैयाँ सर्वसाधारणमा सेयर जारी गरेपछि जम्मा हुने छ । बाँकी सात करोड २० लाख रुपैयाँ प्रभु बैंकले लगानी गरेपछि नेशनल इन्भेष्टमेन्टको पुँजी १५ करोड रुपैयाँ पुग्छ ।

अहिले कम्पनीको सञ्चालक समिति अध्यक्षमा विके श्रेष्ठ छन् । उनी होटल एसोसिएसनका अध्यक्ष छन् । सञ्चालक समिति सदस्यमा उद्योगपति तथा नेपाल उद्योग वाणिज्य महासंघका पूर्वअध्यक्ष रविभक्त श्रेष्ठ, लक्ष्मी समूहका आजादकुमार श्रेष्ठ, ध्रुवकुमार श्रेष्ठ, उमेश श्रेष्ठ र अर्जुनलाल राजवंशी छन् ।

नेशनल इन्भेष्टमेन्टका अहिलेका सञ्चालकहरुले प्रभु बैंकसँग प्रिमियम माग गरेको छ । केही दिनमा सबै प्रकृया सकेर चालु आर्थिक बर्षको अत्यसम्ममा कम्पनी सञ्चालन गर्ने बैंकको योजना छ ।

कम्पनीले धितोपत्र वजारमा ब्रोकर, डिलर तथा बजार निर्माताको रुपमा कार्य गर्ने गराउने उद्देश्य राखेको छ । साथै धितोपत्र निस्कासन, विक्री तथा प्रत्याभूति, सेयर रजिस्ट्रार पुँजी तथा मुद्रा बजारका साधनहरुमा लगानी गर्ने कम्पनीको उद्देश्य छ । जग्गा विकास तथा आवासीय कार्यक्रमहरु सञ्चालन गर्ने काम पनि नयाँ संस्थाले गर्ने छ ।

प्रभु समूह अन्तर्गत अहिले प्रभु बैंक, प्रभु इन्स्योरेन्स, प्रभु मनि ट्रान्सफरहरु सञ्चालनमा छन् । समूहले बैंकमार्फत नेशनल इन्भेष्टमेन्टका साथै नयाँ लघुवित्त विकास बैंक पनि सञ्चालन गर्ने तयारी गरिरहेको छ । लघुवित्त विकास बैंकका लागि बैंकले नेपाल राष्ट्र बैंकमा आवेदन दिएको छ । लघुवित्तको केन्द्रीय कार्यालय नुवाकोट जिल्ला हुने छ ।

नेशनल इन्भेष्टमेन्टले अहिले एक करोड ५० लाख रुपैयाँ बैंकहरुको मुद्दति निक्षेपमा जम्मा गरेर नाफा आर्जन गरिरहेको छ । कम्पनीले केही रकम सेयर बजारमा पनि लगानी गरेको छ । कम्पनीले वासलातमा नाफा देखाउँदै लाभांस वितरण पनि गर्दै आएको छ ।