लेकसाइडबाट स्तुपा जाने केवलकार बनाउन बाटो खुल्यो, ड्रिम प्रोजेक्ट बनाउने मनकामनाको योजना

काठमाडौं । मनकामना दर्शनले कास्कीमा केबुलकार बनाउन बाटो खुला भएको छ ।  पोखराको लेकसाइडदेखि विश्व शान्ति स्तुपा सम्म जाने केबुलकार निर्माणको लागि प्रतिस्पर्धी प्रस्ताव लक्ष्मी इन्टरकन्टिनेन्टलको रिट सर्वोच्च अदालतले खारेज गरेपछि कम्पनीलाई केबुलकार निर्माणको बाटो खुलेको हो ।

सर्वोच्चका न्यायधिशद्वय जगदीश शर्मा पौडेल र बैजनाथ उपाध्यायको संयुक्त इजलाशले लक्ष्मीको रिट खारेजको आदेश दिएको हो ।

‘केबुलकार निर्माणको लागि बाटो खुला भएको छ । यो निर्णयसँगै हामी निर्माणमा अघि बढ्नेछौ,’ कम्पनीका संचालक राजेशबाबु श्रेष्ठले आइतबार बिजमान्डूसँग भने, ‘यो हाम्रो अर्को ड्रिम प्रोजेक्ट हुनेछ ।’ उनका अनुसार यो केबुलकार निर्माणले पोखराको पर्यटनमा समेत थप टेवा दिनेछ ।

 चितवन कोई समूहले मनकामना मन्दिरसम्म पुग्ने मनकामना केबुलकार संचालनमा छ । पहिलो केबुलकार परियोजनाले नेपालको रोलमोडल बनेको छ ।

मनकामना दर्शन र विदेशी निर्माण साझेदार कम्पनी डोपलमायरले यो केबुलकार निर्माण हुनेछ ।
केबुलकारसँगै वाटर पार्क, रेस्टुरेन्ट लगायतका सेवा सुविधा समेत हुने श्रेष्ठले बताए । उनका अनुसार  १.६किलोमिटर लामो सो केबुलकार निर्माण भएपछि पर्यटन क्षेत्रमाअर्को एक आकर्षण थपिने उनले बताए ।