घरजग्गा कारोवार विग्रियो, फिल्म निर्माताको घर, होटल सञ्चालकको गाडी लिलामीमा

काठमाडौं । चलचित्र निर्माता मधुसुदन शिलवालले घरजग्गा कारोवारका लागि ल्याएको बैंक ऋण तिर्न नसकेपछि उनको चावहिल गणेशस्थानको जग्गा लिलाम हुने भएको छ । प्राइम कमर्सियल बैंकले ऋण नतिरेपछि अन्तिम पटकका लागि लिलाम विक्रीको सुचना सार्वजनिक गरेको हो  ।
उनले ऋण भुक्तानी गर्न नसके बैंकले सात दिन पछि सम्पति विक्री गर्न सक्ने छ । तत्कालिन गौरीगणेश इन्भेस्टमेन्ट अहिलेको जेन्टल हाउजिङका नाममा उनले ऋण लिएका थिए । नेपाल टेलिकमसामुन्ने मुलसडकसँग जोडिएको दुई रोपनी दुई आना तीन पैसा तीन दाम जग्गा धितो राखेर शिलवालले ऋण लिएका थिए । बजार मूल्य अनुसार अहिले यो जग्गाको भाउ १० करोड रुपैयाँभन्दा माथि छ । बैंकले यही जग्गा लिलाम गर्न लागेको हो ।
क्यापिटल मेर्चेन्ट बैंकिङ एन्ड फाइनान्सको घोटलामा पनि उनको संलग्नता पाइउपछि राष्ट्र बैंकले अनुसन्धान गरिहेको छ । उनले अस्वभाविक रुपमा कमाएको पुस्टी भएपछि राष्ट्र बैंकको उजुरीमा सम्पति सुद्धिकरण विभागलेसमेत उनीमाथि अनुसन्धान गरिरहेको स्रोतले जानकारी दिएको छ ।
सिलवाल सिद्धार्थ डेभलपमेन्ट बंैकका पूर्वसञ्चालक हुन् भने किस्ट बैंकमा समेत १० करोड रुपैयाँको ऋण छ । श्रीगणेश जेन्टल फिल्म्सको व्यानरमा उनले जीवन रेखा, ए पण्डित बाजे, मनमा माया र मेरो के गति हुने हो भन्ने चार वटा चलचित्र निर्माण गरिसकेका छन् ।
यसैगरी कान्तिपथस्थित होटल माउन्टेनका सञ्चालक रविन्द्रमान मल्लको गाडिसमेत लिलामीमा चढेको छ । लुम्बिनी फाइनान्स एन्ड लिजिङबाट लिएको ऋण तिर्न नसक्दा उनको बा ५च ३०५३ नम्बरको ल्यान्ड रोभर जिप लिलामीमा पर्न लागेको हो । त्यसबाहेक उनले दि ल्याण्डमार्क अपार्टमेन्टका लागि ल्याएको ऋण नतिरे पछि  उनका लागि जमानी बसिदिने मिनर्भा मल्ल, उर्मिला वैद्य र प्रकाशबहादुर श्रेष्ठको घरजग्गा तथा बैंक सेयर लिलामी गर्ने फाइनान्सले जानकारी दिएको छ । मल्ल जमानी बसेर श्रेष्ठका लागि किनिदिएको बिएमडब्लु गाडी पनि फाइनान्सले लिलामीमा चढाएको छ ।