धनुषामा तीन दिनमा १ करोड ५८ लाखको सामान बरामद, ८९ लाखको ६०० कार्टुन मदिरा

बिजमाण्डू
२०८१ जेठ २ गते १४:२५ | May 15, 2024
धनुषामा तीन दिनमा १ करोड ५८ लाखको सामान बरामद, ८९ लाखको ६०० कार्टुन मदिरा

काठमाडौं । जिल्ला प्रहरी कार्यालय धनुषाले तीन दिनमा डेढ करोडभन्दा बढी लागतका भन्सार छलेर ल्याइएका सामान नियन्त्रणमा लिएको छ।

Tata
GBIME
Nepal Life

धनुषाका प्रहरी प्रमुख प्रहरी उपरीक्षक भुवनेश्वर तिवारीले तीन दिनमा एक करोड ५८ लाख ६५ हजारभन्दा बढीका सामानसहित गाडी र चालकलाई नियन्त्रणमा लिइएका जानकारी दिए।

उनका अनुसार जिल्ला प्रहरी कार्यालय र मातहतको इकाइबाट खटेको प्रहरी टोलीले गत वैशाख २९ गते बिहान बिलविजकभन्दा २३ लाख ४५ हजार ८४० बढीका सामानसहित पिकअप गाडी र चालकलाई नियन्त्रणमा लिएको हो।

यस्तै, वैशाख ३० गते राती ३४ लाख ९१ हजार २०० रुपैयाँ बराबरको २१ क्वीन्टल प्याजसहित ट्रक र चालकलाई नियन्त्रणमा लिएको तिवारीले बताए। वैशाख ३१ गते दिउँसो ८९ लाख ४६ हजार ९०० रुपैयाँ बराबरको ६ सय कार्टुन मदिरासहितको ट्रक ढल्केवर नियन्त्रणमा लिएको थियो। सोही दिन गणेशमान चारनाथ नगरपालिका-८ बाट १० लाख ८१ हजार ३३२ रुपैयाँ बराबरको सामानसहित मोटरसाईकल नियन्त्रणमा लिइएको प्रहरीले जनाएको छ।

नियन्त्रणमा लिएको सामान तथा गाडीहरू थप अनुसन्धानका लागि सम्बन्धित निकायहरु आन्तरिक राजश्व कार्यालय जनकपुर, जनकपुर भन्सार कार्यालय, र राजश्व अनुसन्धान कार्यालय पथलैया पठाइएका छन्।

प्रहरी उपरीक्षक तिवारीले भन्सार छलेर ल्याइएका सामानको ओसारपसार रोक्न वैशाख अन्तिम सातादेखि अभियानकै निगरानी बढाइएको र यसबाट राजश्व चुहावट न्यूनीकरणमा सघाउ पुग्ने अपेक्षा रहेको बताए।