काठमाडौं। इलाका प्रहरी कार्यालय बुटवलका तत्कालीन डीएसपी ठगबहादुर केसीलाई विशेष अदालतले भ्रष्टाचारी ठहर गरेको छ। घूस मुद्दामा केसी दोषी ठहर भएका हुन्।

अध्यक्ष टेकनारायण कुँवर तथा सदस्यहरू तेजनारायण सिंह राई र रितेन्द्र थापाको इजलासले मंगलबार केसीलाई दोषी ठहर गरेको हो। अदालतले उनलाई दुई वर्ष कैद र साढे ८ लाख रुपैयाँ जरिवानाको फैसला गरेको छ।

२०७९ मंसिर २५ गते प्रहरीको टोलीले केसीलाई नियन्त्रणमा लिएको थियो। केसीको निवास खानतलासीमा सुन तथा नगद बरामद भएको थियो। केसीको क्वाटरमा छापा मार्दा ८ लाख ५० हजार रुपैयाँ भेटिएको प्रहरीले जानकारी दिएको छ। यस्तै ९ लाख ५० हजार रुपैयाँको चेक समेत बरामद भएको थियो।

घूस रिसवत लिएको तथा लिन लगाएको कसुरमा अख्तियारले भदौ १३ गते विशेष अदालतमा मुद्दा दायर गरेको थियो।