खुम्बु पासाङल्हामुमा ८ महिनामा पुगे ३१ हजार बढी विदेशी पर्यटक, उठ्यो ६ करोड राजस्व

बिजमाण्डू
२०८० चैत्र २० गते ०८:१३ | Apr 2, 2024
खुम्बु पासाङल्हामुमा ८ महिनामा पुगे ३१ हजार बढी विदेशी पर्यटक, उठ्यो ६ करोड राजस्व
Photo: RSS

काठमाडौं । सोलुखुम्बुको खुम्बु पासाङल्हामू गाउँपालिकाले चालु आर्थिक वर्षको ८ महिनामा पर्यटकबाट ६ करोड ३४ हजार पाँच सय राजस्व संकलन गरेको छ।

Tata
GBIME
Nepal Life

पालिकाले खुम्बुक्षेत्र घुम्न आएका विदेशी पर्यटक प्रवेश शुल्कबाट उक्त राजस्व संकलन गरेको हो। ८ महिना अवधिमा ३१ हजार ७२५ जना विदेशी नागरिकले खुम्बु क्षेत्रको भ्रमण गरेका छन्।

सबैभन्दा बढी कात्तिक महिनामा ११ हजार ६०३ जना विदेशी पर्यटकले खुम्बु भ्रमण गरेका छन्। त्यसैगरि साउनमा ३२३ जना, भदौमा एक हजार ७०९ जना, असोजमा एक हजार ८०२ जना विदेशी पर्यटक खुम्बु पुगेको गाउँपालिकाको तथ्यांकमा उल्लेख छ।

त्यस्तै मंसिरमा दुई हजार ८०० जना, पुसमा एक हजार ३०२ जना, माघमा ६०२ जना र फागुनमा दुई हजार ५८४ जना विदेशी पर्यटकले सो क्षेत्र भ्रमण गरेको गाउँपालिकाका लेखा अधिकुत चेतनाथ कटेलले जानकारी दिए।

पालिकाले स्थानीय शुल्क स्वरुप एकजना विदेशी पर्यटकबाट दुई हजार रुपैयाँ प्रवेश शुल्क लिने गरेको छ। पदयात्री सूचना व्यवस्थापन प्रणाली (टिम्स) कार्ड निषेध गर्दै गाउँपालिकाले विसं २०७४ देखि शुल्क लिन सुरु गरेको थियो।

त्यसअघि नेपाल पर्यटन बोर्ड र ट्रेकिङ एजेन्सी एशोसिएशन अफ नेपाल (टान) ले टिम्स कार्डवापत पर्यटक बापत् दुई हजार शुल्क लिने गरेको थियो।

गाउँपालिकाले लिएको शुल्कले पर्यटन पूर्वाधार निर्माणलगायत काम गर्ने गरेको गाउँपालिका अध्यक्ष मिङ्मा छिरी शेर्पाले बताए। विश्वको सर्वोच्च शिखर सगरमाथासहित थामसेर्कु, कोङ्दे, आमादब्लमलगायतका हिमशृङ्खला खुम्बु पासाङल्हामू गाउँपालिकाभित्र पर्छ।