विराटनगर। देशभरि आउटलेट विस्तारमा आक्रामक भइरहेको भाटभटेनी सुपर स्टोरले वाग्मती प्रदेशको राजधानी हेटौंडामा यही मंसिर २२ गतेदेखि नयाँ स्टोरको सञ्चालन गर्ने भएको छ।

भाटभटेनीका अध्यक्ष मीनबहादुर गुरुङले भाटभटेनीको १ सय ५० करोडको लगानीमा निर्मित २० औं स्टोरको उद्घाटन गर्न लागेका हुन्।

अध्यक्ष गुरुङका अनुसार हेटौंडा-२ चौकी टोलमा भाटभटेनीको सुपर स्टोरको निर्माण गरिएको छ। यो स्टोर पुग्न हेटौँडाको मुख्य बजारको बुद्ध चौकबाट ४ सय मिटर ओरालो झर्नुपर्ने हुन्छ।

गुरुङले स्टोर परिसरको जमिन र निर्माणका लागि १ सय ५० करोडको लगानी भएको बताए। भाटभटेनीका व्यवस्थापक विनोद भट्टराईले चौकी टोलमा खरिद गरिएको १४ कट्ठा ५ धुर जग्गामा स्टोरको २ वटा बेसमेन्टसहित ८ तले भवनको निर्माण गरिएको बताए। भवनको कुल क्षेत्रफल १ लाख ३४ हजार वर्गफिट छ।

व्यवस्थापक भट्टराईका अनुसार २ वटा बेसमेन्टमा पार्किङको प्रबन्ध गरिएको छ। दुबै बेसमेन्टमा गरी ३ सय गाडी र ७ सय मोटर साइकल अटाउने क्षमता छ।स्टोरको भुइँतल्लामा खाद्यान्न, फलफूल, हरियो तरकारी, फ्रोजन आइटम, हाउस होल्डका सामान र मन्जन–टुथ ब्रस लगायतका कस्मेटिक सामग्री राखिनेछन्।

यही तलामा केएफसीको आउटलेट रहेको भट्टराईले जनाए। यस तलामा ९ वटा काउन्टर छन्। त्यस्तै पहिलो तलामा किचनवेयर, भाँडाकुँडा, बालबालिकाका खेलौना र शृङ्गार प्रसाधनका कस्मेटिक सामग्री हुनेछन्। यही तलामा पेपे पिज्जाको आउटलेटसमेत राखिनेछ। यस तलामा ६ वटा काउन्टर हुनेछन्।

दोस्रो तला महिला र पुरुषका तयारी गार्मेन्ट, सारी, कुर्ता लगायतका पहिरनका सामग्रीका लागि छुट्याइएको छ। यस तलामा न्यू ब्यालेन्स, एनबी, फिला, स्केयर्स र युएस पोलोजस्ता विश्वप्रसिद्ध ब्रान्डेड कम्पनीका तयारी कपडा पाइने भट्टराईले बताए। यस तलामा ८ वटा काउन्टर राखिनेछन्।
तेस्रो तलामा जुत्ताचप्पल लगायतका फुटवेयर हुनेछन्।

यही तलामा टीभी, फ्रिज, वासिङ मेसिन, माइक्रो ओभन, भ्याकुम क्लिनर जस्ता इलेक्ट्रोनिक्स सामग्री राखिनेछन्। यस तलामा ४ वटा काउन्टर हुने व्यवस्थापक भट्टराईले बताए। चौथो तलामा क्यू एन्ड यु कम्पनीका फर्निचर राखिनेछन्। पाँचौं तलामा तत्कालका लागि खालि हल छ। यही तलामा स्टोरको प्रशासनिक र व्यवस्थापकीय कार्यालय पनि राखिएको छ। यो तला अझै निर्माणाधीन छ।

छैटौं तलामा स्टोरको गोदाम बनाइएको छ। भाटभटेनीले काठमाडौंको टोखा र सानागाउँ, पश्चिम नेपालको धनगढी, प्रदेश नम्बर २ को जनकपुर र वीरगञ्ज तथा पूर्वको झापा जिल्लास्थित बिर्तामोड गरी ६ ठाउँमा स्टोर सञ्चालनका लागि निर्माण कार्य गरिरहेको भट्टराईले जानकारी दिए।