काठमाडौं। पर्यटनमन्त्री उमाशंकर अरगरियाले नेपाल वायुसेवा निगमका कार्यकारी अध्यक्ष सुशील घिमिरेले दिएको राजीनामाको वास्तविकता बुझेर मात्र स्वीकृत गर्ने बताएका छन्।

घिमिरेले गत शुक्रबार (जेठ २८ मा) कार्यकारी अध्यक्ष पदबाट राजीनामा दिएका थिए।

पूर्व पर्यटन सचिवसमेत रहिसकेका घिमिरेले लामो समय निजामती सेवामा बिताएका छन्। अब भने पूर्णरूपमा अवकाशपछिको जीवनयापन गर्ने उद्देश्यले अध्यक्ष पदबाट राजिनामा दिएको उनले बताए।

'मैले अध्यक्ष पद छोड्नै खोजेको हो। यो क्षेत्रमा काम गरेको लामो समय भइसकेको छ। अब भने अवकाश लिएर परिवार, आफन्तसँग स्वतन्त्र जीवनयापन गर्ने विचारले राजीनामा दिएको हुँ,' घिमिरेले भने।

यसका साथै लामो समयका लागि परिवारसहित विदेश जाने योजना रहेकाले पनि आफूले राजीनामा दिएको उनले बताए ।

घिमिरेले पूर्णरूपमा अवकाशपछिको जीवनयापनका लागि व्यक्तिगत योजनाका साथ निगम अध्यक्षबाट राजीनामा दिएको बताए पनि पर्यटन मन्त्रालयमा नयाँ मन्त्री नियुक्त हुनेबित्तिकै उनको राजीनामा आएकाले मन्त्रीको चासो यससँग जोडिएको दृष्टिले पनि हेरिएको छ। यद्यपि, घिमिरेले भने नयाँ मन्त्री नियुक्त भएकै बेला राजीनामा दिनु उपयुक्त हुने भएकाले यो निर्णय लिएको जिकिर गरे।

उनी भन्छन्,'यसअघि पनि मैले पटकपटक राजीनामा गर्न खोजेको हो। त्यतिखेर अनुकूलता मिलेको थिएन। अहिले नयाँ मन्त्री आउनुभएको छ। उहाँसँग बसेर काम गर्दा बीचमै छोडेर जाँदा राम्रो हुँदैनथ्यो। यसैले अहिले शुरुमै उपयुक्त हुने ठानेरै राजीनामा दिएको हुँ।'

यसअघि योगेश भट्टराई र भानुभक्त ढकाल पर्यटन मन्त्री हुँदा पनि आफूले अध्यक्षबाट राजीनामा दिन चाहेको उनले खुलासा गरे। भट्टराईले नै २०७७ वैशाख २ मा घिमिरेलाई निगम अध्यक्षको जिम्मेवारीमा नियुक्त गरेका थिए। 

मन्त्री अरगरियाले भने घिमिरेसँग भेटेरै वास्तविक कारण बुझेर मात्र उनको राजीनामा स्वीकृत गर्ने योजना रहेको बताए। 

'उहाँले यसअघि पनि राजीनामा दिनुभएको जानकारी आएको छ। उहाँसँग अहिलेसम्म भेटघाट भएको छैन। अहिले पुनः राजीनामा गर्नुको उहाँले व्यक्तिगत कारण बताउनुभएको छ तर वास्तविकता बुझेर मात्र स्वीकृत गरिनेछ,' मन्त्री अरगरियाले भने।  

घिमिरेले यसअघि ३० वर्ष निजामती सेवामा बिताउँदा त्यस अवधिमा एक वर्ष कामु सचिव र पाँच वर्ष सचिवको भूमिकामा बिताएका थिए। त्यसपछि खुला प्रतिस्पर्धाबाट संयुक्त राष्ट्रसंघमा पनि 'प्रोफेसनल लेवल फोर' अन्तर्गत काम गरेका थिए।

पछिल्लो एक वर्षयता निगम अध्यक्षको जिम्मेवारी सम्हाल्दै आएका घिमिरेको मासिक सेवा सुविधा डेढ लाख रुपैयाँ रहेको बताइएको छ।