वीरगंज। पर्सा जिल्लामा गत वर्षको तुलनामा चालु वर्ष खाद्यान्न उत्पादन बढेको छ। कृषि ज्ञान केन्द्र पर्साका प्रमुख बाली अधिकृत सुरेशप्रसाद चौरसियाका अनुसार खाद्यान्न उत्पादन गत वर्षको तुलनामा २ हजार ७ सय २० मेट्रिक टन बढी भएको छ।
चालु आर्थिक वर्ष ३ हजार ५ सय हेक्टरमा लगाइएको चैते धान १७ हजार ८ सय ५० मेट्रिक टन फलेको छ। ८ हजार ५ सय ५० हेक्टरमा लगाइएको भदैया धान ४४ हजार ७ सय मेट्रिक टन भएको छ भने ३५ हजार हेक्टरमा लगाइएको अगहनी धान १ लाख ६६ हजार २५० मेट्रिक टन उत्पादन भएको केन्द्रले जनाएको छ।
गत वर्ष चैते धान १७ हजार ५ सय ३५ मेट्रिक टन, भदैया ४२ हजार ७ सय ५० र अगहनी १ लाख ६५ हजार ५५० मेट्रिक टन उत्पादन भएको थियो।
यसैगरी २६ हजार ५० हेक्टरमा लगाइएको गहुँ ८५ हजार ९६५ मेट्रिक टन उत्पादन भएको छ। गत वर्ष गहुँ ८० हजार ६ सय मेट्रिक टन भएको थियो। जिल्लामा ५ सय ६० हेक्टरमा हिउँदे मकै र ४ हजार ५० हेक्टरमा वर्षे मकै लगाइएको थियो। मकैको उत्पादन १४ हजार ५ सय ८० मेट्रिक टन भएको केन्द्रको तथ्यांकमा छ। दलहनमा मसुरो, खेसारी, मास, मुङ, राजमा, रहर, चना र तेलहनमा आलस, तोरी, सूर्यमुखी, सरस्युँ, बदामलगायत उत्पादन भएको कृषि ज्ञान केन्द्रले जनाएको छ ।
यस बाहेक उखु, आलु, सुर्ती खेती पनि पर्सा जिल्लामा छ। केन्द्रका निमित्त प्रमुख मुन्नीलाल प्रसादले प्रदेश सरकारबाट जैविक मलका लागि १५ लाख, स्यालो ट्युबवेलका लागि १ करोड १५ लाख, बजार सेडका लागि २५ लाख, कृषि यान्त्रिकरणका लागि ७५ लाख र बजारीकरणका लागि १५ लाख रुपैयाँ बजेट आएको थियो। प्रदेश सरकारको निर्देशन अनुसार किसानहरुका लागि तोकिएको अनुदान सहयोगमा कार्यक्रम सञ्चालन भइरहेको उनले बताए ।