काठमाडौं। सरकारले निवृत्तिभरण (पेन्सन) खाता आगामी मंसिर महिनासम्म नवीकरण गर्नु नपर्ने बनाएको छ। प्रत्येक ६/६ महिनामा अद्यावधिक गर्नुपर्ने खाता केही समयका लागि नवीकरण गर्नु नपर्ने बनाएको हो।

खाता नवीकरण नभएका पेन्सनरहरुलाई पनि नियमित रकम जम्मा गरिदिन सम्पूर्ण बैंकहरुलाई महालेखा नियन्त्रकको कार्यालयले आग्रह गरेको छ। कार्यालयले कोभिड महामारीको कारण बैंकमा भिडभाड हुने भन्दै पुरानै खातामा रकम जम्मा गर्न आग्रह गरेको हो।

अब पेन्सन लिने व्यक्तिहरुले मंसिर मसान्तसम्म नवीकरण नगरी पेन्सन लिन सक्नेछन्। सरकारको संचितकोषबाट स्वीकृत बजेटको परिधिभित्र रहेर सरकारी सेवाबाट निवृत्त भइ पेन्सन लिइरहेका व्यक्ति आफैं बैंकमा उपस्थित भई बैंक खाता सक्रिया गर्नुपर्ने व्यवस्था छ।

यसअघि सरकारले पेन्सन वितरणको समयमा पनि थोरै परिमार्जन गरेको थियो। बैंकहरुले पहिले पेन्सनरको खातामा रकम जम्मा गरिदिएर शोधभर्ना लिने गरेकोमा अहिले सरकारले बैंकलाई रकम उपलब्ध गराएपछि मात्र पेन्सन वापतको रकम जम्मा गरेको छ।

यो व्यवस्थाले साबिकको अग्रिम पेन्सन लिने प्रणालीलाई परिमार्जन गरी महिना बितेपछि मात्रै रकम सेवाग्राहीले पाउँदै आएका छन्।