मकवानपुर। मकवानपुरको थाहा नगरपालिका–९ र काठमाडौँको चन्द्रागिरि नगरपालिका–७ को थानकोट जोड्ने साढे २२ किलोमिटर लामो गणेशमान मार्गको स्तरोन्नतिको काम शुरु भएको छ।
चन्द्रागिरि–४ र ७ मा हाल चार किलोमिटर क्षेत्रमा चट्टान फोरेर सडकलाई फराकिलो गर्ने काम भइरहेको छ। थानकोट–चित्लाङ–गणेशमान मार्ग सरोकार समितिका अध्यक्ष एवं वाग्मती प्रदेशसभा सदस्य रमा आलेमगरका अनुसार उक्त सडकमा ढल निर्माणका साथै ग्राभेल हाल्ने काम आगामी वर्षको वैशाखसम्ममा सम्पन्न हुनेछ। उक्त सडकको स्तरोन्नति गर्न संघीय सरकारले रु १३ करोड उपलब्ध गराएको छ।
दोस्रो चरणमा उक्त सडकलाई कालोपत्र र ढलमा स्ल्याब निर्माण गर्ने कार्यका लागि वाग्मती प्रदेश सरकारले छुट्टै बजेट उपलब्ध गराउने मगरले बताइन्। चित्लाङदेखि कुन्छालसम्म जोड्ने करीब १० किलोमिटर सडकलाई पनि फराकिलो बनाउँदै कालोपत्र गर्ने काम पनि धामाधम भइरहेको छ। केही साताभित्रै कुन्छालदेखि चित्लाङसम्मको सडकखण्डमा साना सवारी साधन सञ्चालनमा ल्याउने तयारी भइरहेको मगरले उल्लेख गरिन्।
चित्लाङ–थानकोट सडकको स्तरोन्नति गरिएपछि मकवानपुरको हेटौंडा र दामन, पालुङबाट मौसमी तरकारी, फलफूल, खाद्यान्न, इन्धन र औषधिलगायत सामग्री ढुवानी गर्न सहज हुने थाहा नगरपालिकाका नगरप्रमुख लवशेर विष्टले बताए। थानकोट–चित्लाङ सडकखण्डमा दुई दशकअघि कच्ची ट्रयाक खोलेर हल्का सवारीसाधन सञ्चालनमा ल्याइएको थियो।