काठमाडौं। समृद्धि फाइनान्स कम्पनी लिमिटेडले असोज १६ देखि १ बराबर २ को अनुपातमा हकप्रद सेयर बिक्री गर्ने भएको छ। कम्पनीले १८ करोड १९ लाख ८० हजार ३ सयको आधारमा २ सय प्रतिशत हकप्रद बिक्री गर्न नेपाल धितोपत्र बोर्डबाट अनुमति पाएसँगै निष्कासन गर्न लागेको हो। 

कम्पनीले एक सय रुपैयाँ अंकित दरका ३६ करोड ३९ लाख ६० हजार ६ सय रुपैयाँ बराबरको ३६ लाख ३९ हजार ६०६ कित्ता हकप्रद जारी गर्नेछ।कम्पनीको उक्त हकप्रदका लागि इच्छुक खरिदकर्ताले कात्तिक ६ गतेसम्म आवेदन दिन सकिन्छ। हकप्रद प्रयोजनका लागि कम्पनीले भदौ १२ मा बुक क्लोजको मिति तय गरेको थियो।

यसअनुसार भदौ ११ गतेसम्म कायम सेयरधनीहरुले मात्र हकप्रदमा आवेदन दिन सक्नेछन्। कम्पनीको हकप्रद सेयरको बिक्री प्रबन्धकमा बिओके क्यापिटल मार्केट लिमिटेड छ। यसका साथै, धितोपत्र बोर्डबाट आस्वा अनुमति प्राप्त बैंक तथा वित्तीय संस्थाबाट पनि आवेदकले आवेदन दिन सक्नेछन्। 

कम्पनीको हकप्रद सेयरलाई इक्रा नेपालले इक्राएनपि आईपीओ ग्रेड ५ रेटिङ प्रदान गरेको छ। ग्रेड ५ रेटिङले फाइनान्सको वित्तीय आधारभूत अवस्था कमजोर रहेको संकेत गर्दछ। हाल कम्पनीको चुक्ता पुँजी १८ करोड १९ लाख ८० हजार ३ सय रुपैयाँ छ।

हकप्रद निष्कासनपछि सो पुँजी ५४ करोड ५९ लाख ४० हजार ९ सय  रुपैयाँ पुग्नेछ। कम्पनीमा ५९.३७ प्रतिशत हिस्सा संस्थापकको सेयर छ भने ४०.६३ प्रतिशत हिस्सा सर्वसाधारणको छ।