काठमाडौं। नबिल बैंकले मुद्दति निक्षेपको ब्याज दर बढाएको छ। बैंकले एक बर्षभन्दा माथि अवधि भएको निक्षेपको ब्याज दर बढाएको हो।
बैंकले १३ देखि २४ महिनासम्म निक्षेप गर्नेलई बार्षिक नौं प्रतिशत ब्याज दिने भएको छ। समाजप्रति उत्तरदायि हुँदै ब्याज बढाएको नबिलले जनाएको छ।
नबिलले मुद्दति खाताको ब्याज बढाइरहँदा कर्जाको भने घटाएको छ। बैंकले साना तथा मझौला कर्जा, धितो कर्जा, व्यक्तिगत ओभरड्राफ्ट तथा घर कर्जा सस्तोमै दिने स्किम ल्याएको छ।
‘नेपालीहरूको मिहिनेतले कमाएको रकम राखिने व्यक्तिगत मुद्दति खाताहरूमा उच्च ब्याज दर आर्जन प्रदान गर्ने र कर्जाको हकमा त्यसको लागत घटाउने हुनाले नयाँ योजनाले महामारीको कारण हुने आर्थिक कठिनाइ कम गर्न मद्दत पुर्याउने छ,’ बैंकले विज्ञप्तिमा भनेको छ।
एक बर्षसम्मको मुद्दतिको ब्याज पनि बढाएर साढे ८ प्रतिशत पुर्याएको छ। २ बर्षभन्दा माथि र ५ बर्षसम्मको व्यक्तिगत मुद्दती खातामा बार्षिक ९.२५ प्रतिशत ब्याज दिने जनाएको छ। बैंकले ५ बर्षभन्दा माथि व्यक्तिगत मुद्दती खातामा बार्षिक ९.५ प्रतिशत ब्याज दिने छ।
बैंकले घर कर्जा ७.४९५ प्रतिशत ब्याजमै उपलब्ध गराउने छ। व्यक्तिगत ओभरड्राफ्ट ७.९९५ प्रतिशत ब्याजमा उपलब्ध गराउने बैंकले जनाएको छ। एक करोड सम्मको कर्जा ७.४९५ र एक करोडभन्दा माथिको कर्जामा ७.९९५ प्रतिशत ब्याजमा उपलब्ध गराउने छ।