काठमाडौं। दसैंअघि आक्रामक ऋण बिस्तार गरेका बैंकहरु दशैंलगत्तै सम्हाल्लिएका छन्। असोज १७ गतेसम्म बैंकहरुले ११० अर्ब रुपैयाँले ऋण बढाएका थिए। त्यसबेलासम्म निक्षेप संकलन ४२ अर्ब रुपैयाँ मात्र थियो।

आक्रमक ऋण लगानीका कारण तरलता संकटमा परेपछि बैंकहरुको ऋण बिस्तार केही खुम्चिएको छ। असोज २४ गतेसम्म आइपुग्दा बैंकहरुको ऋण बिस्तार ५ अर्बले खुम्चिएर २६ खर्ब ३ अर्बमा झरेको छ।

नयाँ आर्थिक बर्ष लागेपछि बैंकहरुले ऋण बिस्तार ह्वात्तै गरेका थिए। बैंकहरुले २६ खर्ब ८ अर्ब रुपैयाँसम्म ऋण बिस्तार पुर्याएका थिए। दशैंपछि माग पनि कम भएको र अल्पकालिन ऋण भुक्तानीसमेत भएकाले पाँच अर्बले घटेको हो।

बैंकहरुले नयाँ आर्थिक बर्षलागेपछि कुल ४६ अर्बले मात्र निक्षेप बढाउन सकेका छन्। असोजमा मात्र ३८ अर्बले निक्षेप बढेको छ। जबकी असोजमा ऋण ४१ अर्बले बढेको थियो। दशैंअघि र पछिको तुलनामा निक्षेप ४ अर्बले बढेर २९ खर्ब २४ अर्ब पुगेको छ।