वीरगंज। सरकारले चालु आर्थिक वर्षको बजेटमार्फत अन्त:शुल्क लगाएपछि मोबाइलको आयात ठूलो गिरावट आएको छ। वीरगंज भन्सार कार्यालयबाट पाँच महिनाको अवधिमा मोबाइल आयात आधा भन्दा बढीले घटेको छ।
वीरगंज भन्सारका सूचना अधिकारी मनीष महतोका अनुसार पुस १६सम्म १ लाख १० हजार ६ सय ९८ थान मोबाइल सेट आयात भएको छ। गत वर्षको सोही अवधिमा २ लाख ४९ हजार २ सय ८० थान मोबाइल सेट भित्रिएको थियो।
मोबाइलको आयात घटेपछि भन्सार राजस्व १ करोड ७८ लाखले घटेको छ। महतोका अनुसार गत वर्ष ३ करोड ५ लाख ९४ हजार रुपैयाँ बराबर भन्सार उठेको थियो। तर चालु आर्थिक वर्षको पाँच महिनामा मोबाइलबाट जम्मा २ करोड १४ लाख ५५ हजार रुपैयाँ बराबरको राजस्व उठेको छ।