विराटनगरको दुर्इवटा व्यापार संघको दु:ख, 'कमिटमेन्ट' गरेको १४ लाख भारु उठाउन पनि हम्मेहम्मे






विराटनगर।सीमावर्ती भारतीय बजार जोगबनीस्थित भन्सारका अधिकारीले मोरङ व्यापार संघ र उद्योग संगठन मोरङका नाममा भारु १४ लाखको बिल पठाएपछि दुबै संस्थाका पदाधिकारी रकम कसरी संकलन अभियान थालेका छन्।
Tata Nexcon AMT


भारतीय भन्सारका अधिकारीले मीरगञ्ज पुल भत्किएर पूर्ण क्षमतामा सञ्चालन नभएको साढे ६ महिनाको अवधिमा सेतुबन्ध–कोशी ब्यारेज भन्सारबाट रिरुट गर्नुपर्दाको यातायात र विविध खर्च भन्दै दुबै संस्थाका नाममा भारु १४ लाखको बिल पठाएका हुन् । मीरगञ्ज पुल भत्किएका बेला दुबै संस्थाको अगुवाइ र अनुरोधमा भारतीय पक्षले सेतुबन्ध–कोशी ब्यारेज नाकाबाट सामान रिरुट गर्न मानेको थियो ।

गत साउन २८ र २९ गते आएको बाढीले मीरगञ्जको पुल क्षतिग्रस्त भएको भदौ ५ गते पत्ता लागेको थियो ।‘त्यस बेला जोगबनी भन्सारका अधिकारीले शर्त राखेका थिए’, उद्योग संगठनका एक पदाधिकारीले भने, ‘उनीहरूले रिरुट गराउन जोगबनीबाट सेतुबन्ध सँधै जानुपर्ने र यसका लागि भाडामा २ वटा गाडी चाहिने माग गरेका थिए । साथै २ थान कम्प्युटर र मोबाइल सेट पनि मागेका थिए ।’

भारतीय भन्सारका अधिकारीको मागअनुसार २ थान कम्प्युटर र मोबाइल सेट व्यापार संघ र उद्योग संगठन मिलेर तुरुन्त पठाइदिएका थिए । गाडीको हिसाब पछि मिलाउँला भन्ने वचन दिएका थिए ।भारतीय भन्सारका अधिकारीले आफ्नो कार्यालयमा पर्याप्त बजेट नआउने र आएको बजेटले रिरुट गराउन नसकिने तर्क दिँदै गाडी र कम्प्युटरको माग गरेका थिए ।

‘हामीले मीरगञ्ज पुलको समस्या एक महिनाभित्र मिलिहाल्छ भनेर उनीहरूका शर्त स्वीकार गर्यौ’, व्यापार संघका एक पदाधिकारीको भनाइ थियो, ‘यति बेला आएर भारु १४ लाखको भुङ्ग्रामा परिन्छ भन्ने कसले सोचेको थियो र ?’ती पदाधिकारीको भनाइ थियो, ‘त्यति बेला जोगबनी भन्सारका अधिकारीले रिरुटमा एक गाडीको भारु १ हजार दस्तुरी लिन्छौँ, तिमीहरूले गाडी, कम्प्युटर केही व्यवस्था गर्नुपर्दैन भन्ने प्रस्ताव पनि राखेका थिए । तर हामीले त्यो मानेनौँ, तपाईंहरूलाई गाडी दिउँला दस्तुरी नलिइदिनोस् भनेर अनुरोध गर्यौ । अब आएर भारु १४ लाख कसरी सङ्कलन गर्ने कठिन भइरहेको छ ।’

त्यस बेला भाडाका २ वटा गाडी खोजेर सहयोग गरिदिने क्लियरिङ एजेन्ट ललित बोहरा गत फागुन २ देखि फरार छन् । बोहरा व्यापार संघका कार्य समितिका सदस्य पनि हुन् । उनी भन्सार परिसरकै राष्ट्रिय वाणिज्य बैङ्कमा १० करोड रुपैयाँको बाउन्स चेक दिएर घोटाला गरेको अभियोगमा फरार भएका हुन् ‘

‘गाडी व्यवस्था गरिदिने फरार छन्’, व्यापार संघका पदाधिकारीले भने, ‘गाडीवालाले दिनको ३ हजार भारु भनिरहेका छन् । अब २ हजारमा व्यवस्था गरेको हो कि ३ हजारमा ? व्यवस्था गरिदिने फरार भए, कहाँ सोध्न जानु ? गाडीवालाले जुन रेट लगायो त्यही दिन बाध्य हुनु परेको छ ।’दुबै संस्थाका पदाधिकारी आइतबार बिहानदेखि कहिले व्यापार संघ र कहिले उद्योग संगठन बसेर कसरी रकम सङ्कलन गर्ने भनेर बारम्बार बैठक गरिरहेका छन् ।
उनीहरूले विराटनगर भन्सारबाट कारोबार गर्ने मझौला र ठूला स्तरका व्यवसायीको लिस्ट बनाएका छन् । व्यवसायीको कारोबारको अनुमान गर्दै भारु २५ हजारदेखि १ लाखसम्म उठाउने सूची पनि तयार भइरहेको छ ।

‘सूची त करिब–करिब तयार भइसक्यो’, एक पदाधिकारीले भने, ‘ठूलो कारोबार गर्ने कतिपय व्यवसायी नै कन्जुस छन् । दिन्छुदिन्छु त भन्छन् तर सधैँ तर्किन्छन् । कसरी रकम जम्मा गर्ने समस्या भइरहेको छ ।’

Share this Story

   

विराटनगरको दुर्इवटा व्यापार संघको दु:ख, 'कमिटमेन्ट' गरेको १४ लाख भारु उठाउन पनि हम्मेहम्मे को लागी कुनै प्रतिक्रिया उपलब्ध छैन ।

नयाँ प्रतिक्रिया पोस्ट गर्नुस

HTML tags हरु सपोर्ट गरिदैन ।
( ई-मेल गोप्य राखिने छ)

[कृपया चित्रमा (क्याप्चामा) देखिएको जस्तै शब्द तल लेख्नुहोस । रिफ्रेश गर्नका लागि चित्रमा (क्याप्चामा) क्लिक गर्नुहोस । ]

Advertisements

Most Read


bizmandu

facebook     twitter
© Copyright 2012 Bizmandu Media Pvt. Ltd. All Rights Reserved.