काठमाडौं  । सरकारले कालीगण्डकी करिडोर र बेनी -आरुघाट – लार्केभन्ज्याङ सडकका लागि थप रकम दिएको छ।अर्थ मन्त्रालयले कालीगण्डकी करिडोरका लागि २० करोड रुपैयाँ थप निकाशा गरेको हो।

चालु आर्थिक बर्षका लागि १० करोड रुपैयाँ बजेट विनियोजन गरिएको थियो ।  त्यस्तै बेनी-आरुघाट -लार्के भन्ज्याङ सडकमा १५ करोड रुपैयाँ रकमान्तरण गरेको छ । आयोजनाका लागि लागि ६ करोड ५० लाख रुपैयाँ थियो ।  यी दुवै सडकमा नेपाली सेनाले काम गरिरहेको छ ।नेपाली सेनाका प्रवक्ता सहायकरथी याम प्रसाद ढकालका अनुसार कालीगण्डकी करिडोर आगामी बर्ष सम्पन्न गर्ने लक्ष्यका साथ काम भइरहेको छ।

सेनाले करिडोरको (गैडाकोट- राम्दी -मालढुङगा) करिव ८० किमी सडक निर्माणको जिम्मा पाएको हो ।सेनाले ८ मिटरमा ट्रयाक खोलेर स्तरोन्नती गरेको थियो ।सरकारले १० मिटरको बनाउने निर्णय गरेपछि त्यही मापदण्ड अनुसार सडक विस्तारको काम भइरहेको छ।

ट्रयाक खोलिसकेर अहिले स्तरोन्नतीको काम भैरहेको सहायकरथी ढकालले जानकारी दिए । साढे सात किमी सडक १ मिटरमा स्तरोन्नती पुरा भएको सेनाले जनाएको छ । त्यस्तै ५ वटै बेलिब्रिज राखिसकेको सेनाले जनाएको छ। आर्थिक बर्ष २०७६/०७७ मा सक्ने लक्ष्य राखिएको छ ।

बेनी-आरुघाट लार्के भन्ज्याङ सडकको करिव १ सय १८ किमी ट्रयाक खोल्ने काम सेना मार्फत भैरहेको छ ।०७४ बैशाखबाट निर्माण सुरु गरिएको यो सडकको करिव १७ किमी ट्रयाक खोलेको ढकालले जानकारी दिए।