काठमाडौं। बैंकर्स संघले ब्यक्तिगत निक्षेपको ब्याज बढाउन बैकहरुलाई खुला गरिदिएपछि ११ बाणिज्य बैंकहरु प्रतिस्पर्धामा उत्रिएका छन्। प्रतिस्पर्धामा बैंकर्स संघका अध्यक्षसमेत रहेका एनबी बैंकका प्रमुख कार्यकारी अधिकृत ज्ञानेन्द्र ढुङ्गाना पनि सामेल भएका छन्।

सुरुमा जनता बैंकले ब्याज १२ प्रतिशत पुर्याएपछि भोलिपल्ट माछापुच्छ्रेले साढे १२ प्रतिशत ब्याज पुर्याएको थियो। त्यसपछि मेगा र सिभिलले १३ प्रतिशत पुर्याएका थिए।

बैंकर्स संघको साधारणसभामा अर्थमन्त्री डा. युवराज खतिवडा र गभर्नर डा. चिरञ्जिबी नेपालले ब्याज नबढाउन सुझाब दिएका थिए। अर्थमन्त्री र गभर्नर मिलेर ब्याज नबढाउन भनेपनि प्रतिस्पर्धा  थामिएको छैन। 

अध्यक्ष ढुङ्गानाको बैंकले ब्याज साढे १२ प्रतिशत पुर्याइसकेको छ। यसवाहेक सेञ्चुरी, लक्ष्मी, सिद्धार्थ, प्राइम, सनराइजलगायत बैंकले ब्याज बढाएका छन्। 

'रमाइलो कुरा के छ भने जसले बैंकर्स संघमा ब्याज बढाउनु हुँदैन भनेर तर्क गर्थे उनीहरु नै अहिले रेसमा लागेका छन्' एक बैंकका प्रमुख कार्यकारी अधिकृतले बिजमाण्डूसँग भने, 'अब उनीहरुले कुन नैतिकताले ब्याज बढाउन हुन्न भन्न सक्छन्? सहमतिको कुरा गर्न सक्छन्?'

बाणिज्य बैंकहरुले विकास बैंक र फाइनान्स कम्पनीलाई समेत उछिनेर ब्याज बृद्धि गरेका छन्। विकास बैंक र फाइनान्स कम्पनीहरुले साढे १२ प्रतिशतभन्दा माथि ब्याज दिएका छैनन्। तर बैंकको ब्याज १३ प्रतिशत प्रकाशित भइसकेको छ। आधा प्रतिशत बढाएर दिन पाइने भएकाले बैंकको ब्याज साढे १३ प्रतिशत पुगिसकेको छ। 

पुराना र अनुभवी बैंकरले भने यसपाली सुझबुझ अपनाएका छन्। सँधैझै स्ट्यान्डर्ड चार्टर्ड बैंकले ब्याज दरमा खासै चासो राखेको छैन। नबिल, नेपाल इन्भेष्टमेन्ट, हिमालयन, एभरेष्ट, एसबिआइ बैंकले पनि ब्याज बृद्धि गरेका छैनन्।

सिटिजन्स, सानिमाजस्ता बीचमा आएका बैंकले पनि ब्याज बढाएका छैनन्। एनआइसी एसिया बैंक पनि यसपाली ब्याज बृद्धि नगरी बसेको छ।