राजधानीमा ठूला बसको लहर, माकलबारी रुटमा जय बाबा गोकर्णेश्वरका बस मंगलबारदेखि

बिजमाण्डू
२०७३ चैत्र ७ गते ११:२६ | Mar 20, 2017
काठमाडौँ । लामो समयदेखिको निलो रंङको साना माइक्रोबसको एकाधिकार रहेको माकलबारी क्षेत्रमा समेत ठूला बस भित्रिएका छन्।  जय बाबा गोकर्णेश्वर नाममा यो क्षेत्रमा २० ठूला बस चल्न लागेका हुन्।
 
मंगलबार विशेष कार्यक्रम गरेर बस सेवा सुरु गर्ने कम्पनी अध्यक्ष चन्द्रबहादुर श्रेष्ठले बताए। यी बस माकलबारीलाई केन्द्र बनाएर बिभिन्न रुटमा चल्नेछन्। माकलबारीबाट गौरीघाट र जोरपाटी दुइवटा बस चल्ने श्रेष्ठले जानकारी दिए। 

Tata
GBIME
Nepal Life


 

१० वटा बस माकलबारीबाट नारायणटार-गौरीघाट-मित्रपार्क-गौशाला हुँदै कोटेश्वर पुगेर चक्रपथ परिक्रमा गर्ने र चावहिलबाट पुन: मित्रपार्क आएर सोही रुटबाट फर्कने छन्। 
 
बाँकी बस भने माकलबारीबाट नारायणटार-जोरपाटी-बौद्ध-चाबहिल-धुम्बाराही हुँदै चक्रपथ परिक्रमा गर्ने र फेरि चावहित पुगेर सोही रुटबाट माकलबारी फर्कनेछन्। 
 
थप पाँचवटा बस समेत तत्काल थपिने कम्पनीले जनाएको छ। ती गाडी चलाउन फाइनान्सिङको काम भइ रहेको र साता भित्र सञ्चालनमा ल्याइ सक्ने जनाइएको छ।
 
ड्राइभर सहित ३५ सिट क्षमताका बसमा निशुल्क वाइफाइ सुविधा हुने कम्पनीले जनाएको छ। अरु बस भन्दा फराकिलो रहेको कारण उभिएर यात्रा गर्न समेत सहज हुने अध्यक्ष श्रेष्ठले बताए। सिट पनि अरु गाडीभन्दा सुविधायुक्त रहेको श्रेष्ठको दावी छ।
 
नारायणटार देखि माकलबारी सडकखण्डमा यसअघि ग्याँसबाट चल्ने ३५ बढी निलो रंङका माइक्रोबस चल्दै आएका थिए। यी माइक्रोबस बाग्मती किनारको रुटबाट नारायणटार-गौरीघाट-मित्रपार्क-गौशला-पुरानोबानेश्वर-मैतीदेवी-पुतलीसडक हुदै रत्नपार्क जान्छन्। 


 

स्थानीयबासीले कामबाट बेलुका घर फर्कंदा माकलबारी जाने गाडी नपाइने गुनासो गर्दै आएका थिए। बेलुका छ बजेपछि हरियो माइक्रोबस समेत नपाइने कारण नारायणटारबाट माकलबारीसम्म लगभग एक किलोमिटर हिड्नु पर्ने विडम्बना रहेको स्थानिय रामहरी श्रेष्ठले बताए। ठूला यी बस सञ्चालनमा आएपछि यो समस्याको हल हुने उनको विश्वास छ। 
 
निलो माइक्रोबस चलाउँदै आएका यातायात व्यवसायीले भने ठूला बसको बिरोध गरेका छन्। आफुहरुसँग छलफल नै नगरि ठूला बस हालेर विस्थापित गर्न खोजेको उनीहरुको आरोप छ।