बनेपा। काभ्रेपलाञ्चोकको दुर्गम गाविस मानिने भुम्लुटार र फलाँटे गाविसका भूकम्पपीडितले पनि आवास अनुदान पाउने भएका छन् ।
राष्ट्रिय पुनःनिर्माण प्राधिकरण जिल्ला समन्वय समितिको आज बसेको बैठकले यस्तो निर्णय गरेको हो । सो क्षेत्रमा रहेको जग्गा नापजाँच भइसकेको प्रमाणित भएपछि सम्बन्धित गाविस वा नगरपालिकाले गरेको सिफारिसका आधारमा उनीहरुलाई आवास अनुदान दिन लागिएको राष्ट्रिय पुनःनिर्माण प्राधिकरण जिल्ला समन्वय समितिका सदस्य सचिव ध्रुव गैंडाले जानकारी दिए।
“यो जिल्लामा जग्गाको कारणले भूकम्पपीडित आवास अनुदान पाउनेबाट वञ्चित हुने अवस्था देखिएपछि यो निर्णय गरेका हौँ” उनले भने। आवास अनुदान पाउने भुम्लुटार गाविसमा पाँच सय ८९ र फलाँटे गाविसमा तीन सय ६७ छन् । उनीहरुले पहिलो किस्ताबापत ५० हजार रुपैयाँ पाउने छन् ।
सदस्य सचिव गैंडाले भूकम्पपीडितलाई दोस्रो किस्ता वितरणका लागि जिविसलाई निर्देशनसमेत दिइएको उल्लेख गर्दै अहिलेसम्म करिब पाँच सय जनाको आवेदन परेको बताए ।
जिल्लाका विभिन्न स्थानमा क्षेत्रगत अध्ययनकालागि सम्बन्धित क्षेत्रका सांसदको संयोजकत्वमा अध्ययन समिति समेत गठन भएको छ । त्यसले १५ दिनभित्रमा अध्ययन पूरा गर्ने छ ।
जिल्लामा अनुदान आवास पाउनबाट वञ्चित भएको गुनासोमा २१ हजार नौ सय २९ मध्ये आठ हजार तीन सय २८ जनाले आवास अनुदान पाएका छन् । अहिलेसम्म ७० हजार छ सय ३४ जनाको आवास अनुदानका लागि लाभग्राही सूचीमा नाम प्रकाशन भएको छ ।
स्थानीय विकास अधिकारी टेकराज निरौलाले गाविस र नगरपालिकाबाट प्राविधिकसहित सिफारिस भएर आए भूकम्पपीडितले दोस्रो किस्ताको रकम पाउने बताए । भूकम्पपीडितले दोस्रो किस्ताबापत एक लाख ५० हजार रुपैयाँ पाउने छन् ।
सहरी विकास भवन डिभिजन कार्यालय, धुलिखेलका प्रमुख अष्टलाल सुवालले प्राविधिकमार्फत कार्यविधि र निरीक्षण पुस्तिका गाविस र नगरपालिका पठाइएको जानकारी दिए।
