काठमाडौं। मेगा बैंक नेपाल लिमिटेड र टुरिज्जम डेभलपमेन्ट बैंक बीच मर्जर सहमति भएको छ । मेगा बैंक सञ्चालक समितिका अध्यक्ष भोजबहादुर शाह र टुरिज्जम डेभलपमेन्ट बैंक सञ्चालक समितिका अध्यक्ष प्राडा पुष्पराज कँडेलले सैद्धान्तिक सहमतिपत्रमा हस्ताक्षर गरे ।
सहमति अनुसार मर्जरपछि बैंकको नाम मेगा बैंक नेपाल लिमिटेड नै रहने मेगा बैंकका शाहले बताए। शाहका अनुसार शेयर स्वाप रेसियो १००: ९५ तय गरिएको हो। डिडिए प्रतिवेदनका आधारमा स्वाप रेसियोलार्इ अन्तिम रुप दिइनेछ।मर्जरपछि मेगा बैंकका अध्यक्ष र प्रमुख कार्यकारी अधिकृतले नै निरन्तरता पाउने सहमति छ।
मेगा बैंकको हालको चुक्ता पुँजी ४ अर्ब १ करोड रुपैँयाँ, १ एक्स्टेन्सन काउण्टर सहित शाखा संख्या ४० तथा ४७ वटा एटिएमहरु रहेको र टुरिज्जम डेभलपमेन्ट बैंकको हालको चुक्ता पुँजी ९१ करोड ९७ लाख रुपैँयाँ, १ एक्स्टेन्सन काउण्टर सहित शाखा संख्या २३ तथा १२ वटा एटिएमहरु रहेको मेगा बैंकका सिईओ अनिल केशरी शाहले जानकारी दिए ।
आगामी साधारणसभाले स्वीकृत गरेकोमा मेगा बैंकको सञ्चालक समितिले आर्थिक वर्ष २०७२\७३ सम्मको वितरणयोग्य सञ्चित मुनाफाबाट हालको चुक्ता पुँजीमा १३.९५% बोनस शेयर जारी गर्ने सिफारिश गरेको पनि उनले बताए ।
टुरिज्जम डेभलपमेन्ट बैंकले हालको चुक्ता पुँजी ९१ करोड ९७ लाख रुपैँयाँमा १८.६०% बोनस शेयर प्रस्ताव गरेको छ । हालै मात्र टुरिज्जम डेभलपमेन्ट बैंकले मातृभूमि बिकास बैंक र कालिन्चोक डेभलपमेन्ट बैंकलाई प्राप्ती गरी पुष २४ गतेबाट संयुक्त कारोबार गरिसकेको छ।